Mawkyrwat, Rymphang 02: Ka Royal Challengers Mawsynram Cricket Team mynta ka sngi ka la long ka nongjop ha ka Mawten IV T20 Cricket Tournament 2023-24 ba la pynïaid da ka Mawten Sports Club (MSC), South West Khasi Hills District hadien ba ka la pynliem noh ïa ka Nongpoh Town Club da 2 ron bad 5 wiket ha ka jingïalehkai phainal kaba la long ha Madan Mawpyllum, Mawten, South West Khasi Hills District.
Ha ka jingïalehkai phainal, ka Nongpoh Town Club ka la jop ïa ka toss bad ka la ryngkat ka jingbuh target 113 run na ki 16.5 overs bad hap noh baroh ki wikets. U nongtied uba la ïoh bun ron tam dei u Pushkar Raj uba la tied 27 na ki 25 bol katba na ki nongbol dei u Andlebert Shangpliang u la ïoh 3 wiket na ki 4 obar bad u Robin Chettri u la ïoh hi 3 wiket na ki 2 obar jong ka Royal Challengers Mawsynram.
Ha ka pali ban beh ïa ka thong, ka Royal Challengers Mawsynram ka la lah ban tied 115 ron bad hap noh 5 wikets na ki 17.1 obar. U nongtied ba la kamai bun dei u Rudy Shangpliang uba la tied 52 run katba u nongkawang bol dei u Md Siraj Ali jong ka Nongpoh Town Club u la ïoh 3 wiket na ki 4 obar.
Ïa ka khusam u ‘rangïalehkai ba tbit ha ka jingïalehkai phainal la ïoh da u Rudy Hess Shangpliang jong ka Royal Challengers Mawsynram uba la tied 53 ron ba ki 32 bol, ïa ka nam kum u nongïoh bun wiket la ïoh da u Robin Chettri jong ka Royal Challengers Mawsynram uba la ïoh haduh 7 wiket marwei, ïa ka nam ba ïoh bun ron ha ka lympung ka leit sha u Rohit Rai jong ka Dunkin SCC, u rangïalehkai ba tbit jong ka lympung ka leit sha u Bharat Gurung jong ka Nongpoh Town Club.
Ha kane ka sngi la ïoh ruh ban sam ïa ki khusnam ha ryngkat ka song pisa sha baroh ar kynhun kaba la poi sha ka thong jong ka jingjop bad kumjuh ruh ka kynhun kaba la shah rem noh ha ka phainal kata ka Royal Challengers ka la ïoh ban rah ïa ka song pisa kaba T. 40,000/- ryngkat katba ka Nongpoh Town Club ka la ïoh T. 20,000/-.
Ïa kane ka lympung ïalehkai kriket jong ka Mawten IV T20 Cricket Tournament 2023-24 la khylliap pyrda da u bah Gideon Kharkongor, Honorary Secretary jong ka Meghalaya Cricket Association kum u kongsan ha ka jingsynranlang u Dhrubajyoti Takuria, Honorary Treasurer jong ka Meghalaya Cricket Association, ki dkhot ka South West Khasi Hills District Cricket Association, ki ‘riew rangbah naduh ki nongkitkam jong ka Mawten Sports Club kiba dei jong ka Cricket Committee lem bad kiwei de naduh ki nongkyrshan jong ki ar tylli ki kynhun bad kumjuh ruh ki nongpeitkai.
