Pyrshah ïa ka Inter Kashi bteng ka Lajong ïa ka lynti ïaid ha ka lympung I-League Shillong, Rymphang 02: Ka kynhun ïalehkai Shillong Lajong FC kan bteng ïa ka lynti ïaid jong ka ha ka lympung I-League pyrshah ïa ka kynhun ba dang thymmai na Uttar Pradesh, ka Inter Kashi, mynta ka sngi ha ka por 7 baje janmiet ha madan SSA Stadium, Shillong. Kane kan long ruh ka sien kaba nyngkong ban pynïalehkai ba ka Lajong kan ïakhun ha ka por jan miet hapoh katei ka madan bad ruh ka sien kaba nyngkong ïa kine ki ar kynhun ban aireng pyrshah. Ka Lajong kan jam sha kane ka jingïakhun ryngkat ki 19 point kiba ka la ïoh ban khur bad ka shong ha ka kyrdan ba 5 ha ka miej da 5 sien jop, 4 sien ïakhaid bad rem 2 sien. Hynne ka sngi haba ai jingkren sha ki lad pathai khubor, na ka liang jong u head coach ka Lajong-u Bah Bobby L. Nongbet u la pynpaw ïa jingsngewthikna bad kyrmen skhem ba ka kynhun kan khur ïa baroh lai point na katei ka jingïakhun, watla ka Inter Kashi ka dei kawei na ki kynhun ba khlaiñ ha kane ka lympung. Haba phai sha ka Inter Kashi, ka shong ha ka kyrdan ba 8 da 4 sien jop, 3 sien ïakhaid, rem 4 sien bad khur 15 point na baroh ki jingïakhun ba ladep. Baroh ar kynhun kin hap ban ïakhun tyngeh ban kyntiew ïalade kham shalor ha ka miej.