Nongstoiñ, Rymphang 02: Kum shibynta na ka jingpyrshang jong ka Sorkar ban shna ïa ki madan ïalehkai kiba janai ha ki shnong Nongkyndong, u Myntri Rangbah ka Jylla Conrad K Sangma ha ka sngi Thohdieng u la buh ïa u maw nongrim ban shna ïa ka madan Artificial Turf ha madan Riangdo, West Khasi Hills District.
Kane ka madan ïalehkai phutbol ha Riangdo ka dei ka madan ba kongsan bha ym tang ïa ka Riangdo, hynrei wat ïa ki thaiñ kiba marjan ba kin pynlong ïa ki lympung ïalehkai bapher bapher.
Ïa kane ka project la mang ban pynlut haduh T.10 klur ban shna pynbha bad kyntiew kyrdan ïa kane ka madan, ïa kaba la buh por ban pyndep hapoh ka 18 bnai. Ka madan ïalehkai phutbol ka Riangdo, kan dei ruh ka madan ïalehkai ba nyngkong eh ka West Khasi Hills ban shna da ka artificial turf.
Haba ai jingkren, u Myntri Rangbah ka Jylla u la ong, “Nga tip ba bun ki briew kiba don ha la ki kam ki jam, ki la ju ïalehkai phutbol ha kane ka madan. Hynrei la 52 snem kam shym la don satia ka jingkynshew pisa ban pynbha ïa kane ka madan”.
U la ban jur ruh ba ka Sorkar ka la shna ïa bun tylli ki stadium bad ki madan ïalehkai ha kine ki san snem ba la leit noh, ban ïa kaei kaba la leh ha kine ki 45 snem baroh lang. U ong, kane ka phalang ïa ka jingkut jingmut jong ka Sorkar na ka bynta ka bha ka miat jong ki samla bad ban plie lad ïa ki ba kin nang kiew shaphrang ha ki kam ïalehkai.
Haba pynpaw ïa ka jingsarong ïa ka jingjop ka kynhun ïalehkai phutbol ka Meghalaya ha ka Khelo India Youth Games 2023 da ka jingïoh ïa ka takma ksiar, u Myntri Rangbah u la ong, “Ka dei ka khyllipmat ba sngew sarong ïa ngi baroh, ba ki samla jong ngi kila wanrah ïa ka nam bad ïa ka Cup sha ka Jylla jong ngi. Kane ka pyni ruh ba ki khun ki kti jong ngi kim dei kiba duna”. U Myntri Rangbah u la kren ruh halor ki prokam ai jingïarap song pisa, ki khusnam song pisa bad ka scholarship jong ka Sorkar ïa ki nongïoh takma khnang ba ki samla kin lah ban nang pynleit jingmut ban long tista ha ki kam ïalehkai kaba ki don sap.
“Ngin ym kut tang ha ka jingshna madan ïalehkai hynrei ban ïatreilang ruh bad ki Sports Association bapher bapher ban kyntiew ïa ki kam ïalehkai” u la ong.
Kiwei kiwei kiba la don ban sakhi ha kane ka sngi, ki kynthup naduh u Myntri ka tnad ïalehkai ka Jylla u Bah Shakliar Warjri, MLA ka thaiñ Bah Methodius Dkhar, Bah R.G Momin MLA Rambrai, u Deputy Commissioner ka West Khasi Hills District Bah Garod L.S.N Dykes bad kiwei kiwei de ki Ophisar na ka tnad Sports.
