Shillong, Nailar 03: Ki jingïakhun ka lympung 133rd IndianOil Durand Cup ha Shillong kan sa nang khring shuh shuh ïa ki paidbah hadien ba ka Meghalaya ka la ïoh sa kawei ka klob trai jylla ban ïakhun na ka Group F; ki jingïakhun ba la pynkhreh ha nongbah Shillong.
Katkum ka prokram ba la pynbeit kaba ladep, tang kawei ka kynhun trai jylla (Shillong Lajong FC) kaba ïoh ïakhun na ka Group-F ryngkat bad ar tylli ki klob ISL ba kynthup ïa ka FC Goa bad ka Hyderabad FC, nangta ka kynhun shipai na Nepal – ka Tribhuwan Army.
Hynrei kumba ka paw mynta, ka Hyderabad FC, kawei na ki kynhun ba la bynta ban ïakhun na kane ka Group, ka la weng noh ïalade ban shimbynta ha kane ka lympung namar ki daw ki bym lah kiar. Watla ki don shibun ki klob kiba khlaiñbor kiba dang lait ban bujli ïa kane ka jaka ha kane ka Group, ka Sorkar jylla Meghalaya ka la ai jingmut ban kynthup ïa ka Rangdajied United FC (RUFC), ïa kaba la pdiang kylluid mynsiem da ka Durand Cup Organising Committee.
Ka Sorkar Jylla Meghalaya kaba la don bynta ban pynroi ïa ka sap lehkai phutbol ki samla trai ri hapoh ka jylla ka la kyrshan ïa ka rai ban kynthuplang ïa ka RUFC ha kane ka lympung.
Ki paid riew ieid phutbol ka jylla kin sngewkmen ban ïohi shuh shuh ïa ki rangïalehkai trai ri jong ka thaiñ ki ban aireng pyrshah ïa ki kynhun bad rangïalehkai kiba nabar. Ka jingshah kynthup ka Rangdajied kum ka kynhun ba saw ban bujli ïa ka Hyderabad FC kan sa nang pynshongshit ïa ka JN Stadium bad kan nang khring shuh shuh ïa ki paidbah ban wan peit ïa ki jingïalehkai.
Kumta ka jingïalehkai kaba nyngkong jong ka Rangdajied United FC kan long pyrshah ïa ka FC Goa ha ka Lah Sngi U Blei (lashai ka sngi), 05 tarik u Nailar, 2024 ha ka por 7 baje janmiet. ïa ka jingdie ïa ki tiket yn sa pyllait noh shen, bad yn sa die ruh na Box Office hajan Golf link ha katei ka sngi ïalehkai.
Na ka liang jong u Myntri ka tnat ïalehkai jong ka Sorkar Jylla, u la dap da ka jingsngewnguh ïa ka rai ban kynthup sa kawei ka kynhun trai jylla, da kaba pynpaw, “Ka long kaei kaei kaba sngewsarong ïa ka Meghalaya ban ïoh ar tylli ki klob ki ban ïakhun ha ka Durand Cup. Kane ka dei ka sien kaba nyngkong ba kane ka lympung la ïoh ban pynlong ha Shillong, bad ka Rangdajied United FC kan ïalehkai na kajuh ka Group ryngkat bad ka Shillong Lajong FC ka ban sa nang khring bad ailad ïa ka Meghalaya ban sei madan ïa ka sap ïalehkai phutbol ba ka don.”
Ka Durand Cup ka la long ka lympung kaba ju plielad ïa ki khlur phutbol ba thymmai ban kiew shaphrang, bad la khmihlynti ba kin don katto katne ki khlur ïalehkai na ka Meghalaya ki ban tyngshaiñ lyngba kine ki jingïalehkai.
