Hooid kam dei shuh ka sien kaba nyngkong ba ki Sengbhalang kin khynra ïa ki nongtrei ne ki nongbylla bymdei ki trai jylla, namar ba kumba ka long hi baroh ngi sakhi ba ka jingdon jong ki briew kiba nabar ka la jyllei palat shisha ha kine ki lum Khasi Jaintia, jong ka jylla bad khamtam lei ha kane ka Nongbah Shillong. La iohi ba ha kine ki khyndiat sngi ba hadien ka jingkhynra nongbylla bar jylla kaba la jan shi bnai da ki Sengbhalang bad khamtam ka KSU, ka sorkar jylla hynnin ka sngi ka la rai ban pyrkhing noh ïa ki nongbylla nabar kiba wan bylla shane.
Ïa kane ka rai la shim ha ka jingïalang jong ka Kynhun Myntri kaba la long hynnin ka sngi bad na ka liang jong U Bah Paul Lyngdoh, nongaiktien jong ka Sorkar, u la ïathuh ba kane ka jingpyrkhing ka long da kaba pynkhlaiñ ïa ka jingtreikam ka MRSSA, lyngba ka Meghalaya Indentification Registration Safety and Security of Migrant Workers bad ka Meghalaya Identification Registration Safety and Security of Migrant Workers Rules 2020 ha kaba yn nym shah shuh ïa ki nongbylla na shabar kiba don ki dak sniew ne ki criminal record ba ki wan bylla shane. ïa kane yn pyrkhing lyngba ka system kaba ka la don lypa bad ki Pulit.
Kyrmen ba ka sorkar kan lah ban shim khia bad pyntreikam ïa ki lad ki lynti kiba la dep pynbeit khnang ba ki briew kiba nabar kin ym shim kabu ban shu wan tuid khyrthep sha kane ka ri Lum Khasi Jaintia. Ka jingïoh rung laitlan jong ki briew kiba nabar khlem kano kano ka jingpyrkhing ka buh shibun ki jingma na ka bynta ka jaidbynriew ritpaid ym tang ba ka long kumba ki khnieh ïa ka pliang ja jong ki trai ri shnong. Kawei ka jingma kaba ym dei ba ka ktah tang shiteng por hynrei ka ïoh shongskum syndon, ka dei ka jinghiar thma ba jar jan jong ki briew kiba nabar ban shongkha bad ki jaidbynriew rit paid jong ngi. Ka jingshong kha khleh ngi sakhi ba ka pyntlot bha ïa ka jingieit ïa la ka jong ka tynrai bad ka jinglong kyrpang kum ka jaidbynriew rit paid. Teng teng i shisha kumba kane ka jaidbynriew jong ngi kan sa jah noh ha kawei ka sngi.
Ka long kaba sngewtynnad ban ïohi bad ka sorkar ka thmu ban wanrah da ka amendment halor kane ka aiñ kaba la mynjur ha u snem 2020, ha kaba kino kino kiba pynkheiñ ïa ka aiñ ne ïa ki kyndon, yn shaiñ kuna noh 1 lak tyngka, ym shuh 5 hajar kumba don ha ki kyndon kiba rim. Nangta lada don pat kiba pynkheiñ biang ïa ki kyndon palat ïa ka shisien, yn set phatok ïa ki lai bnai. Kyrmen ba kan ym kut tang ha ki jingthmu hynrei ba ka sorkar kan da pynpaw shisha ki paidbah halor ki kam ba ka pyntreikam na ka por sha ka por lyngba ki tnad pathai khubor. Ka jingpyntip sha ki paidbah ka long kum ka jingaibor ïa ki ba kin don ïa ka mynsiem ban sngew thikna bad sngew don ruh ka jingkitkhlieh ban ïatreilang bad ka sorkar bad ruh sngew thikna ban shaniah ha ka sorkar.
Ngim lah ban leh ba ka daw kaba la pynlong ïa kiba bun ki Sengbhalang na ka por sha ka por ban pynlong ka jingkhynra ïa ki nongbylla bar jylla ha kylleng kylleng ki jaka jong ka Ri Khasi Jaiñtia, ka dei halor ka jingbym shaniah ban shu ieh tang ha ka sorkar. Namar ba la sakhi ba katba nangmih ki sngi ki bar jylla ki nang jyllei nang jyllei haduh ba ym lah ban len, hynrei ka long shisha kaba ima. La iohi ba lyngba kitei ki jingkynra jong ki sengbhalang da ki hajar ngut ki nongbylla bar jylla ki la phet noh sha la shnong namar kane ka jingshah khynra. Kumta ka long kaba donkam ïa ka sorkar ban shim khia ïa kane ka kam, namar ba ka sorkar ka don ïa ka bor pisa bad bor pahara ha baroh kawei ka jylla.
Kat kum ka khubor la ïohi ruh ba kiba bun ki nongïalam jong ka KSU ki la shah khot hajir ha ki Pulit ha kaba ïadei bad kane ka jingkhynra nongbylla bar jylla, namar ka sorkar ka ong ba kam dei kamram jong ki ban khynra, hynrei kadei ka kamram jong ka Labour Department. Ym lah ban len lada ka jingshakri jong ki tnad sorkar kam lah satia ban pynpoi sha ka thong, kumta haba kum ki sengbhalang kiba don ka jingkitkhlieh na ka bynta la ka jong ka ri bad ka Jaidbynriew ki ailem ïa ka kti ka mon ka kti ka diang, ka long kaba donkam ïa ki bor sorkar ban pynshong nongrim ha ka rukom kaba ai mynsiem ïa ki. Kumba ngi ju ïohsngew barabor ba ka sorkar ka khot ïa ka jingïatreilang jong ki paidbah ha kaba ïadei bad ka bha ka miat jong ka imlang sahlang.
