Yn aireng u Messi ïa u khunlung ba u la pynsum 19 snem mynshwa

NEW YORK, Naitung 18: Ha u snem 2007, ka la don ka jingshon dur (photoshoot) na ka bynta ka prokram ai jingïarap kaba la long ha Camp Nou ha kaba la ring dur ïa u Lionel Messi ryngkat bad u khyllung ba dang hynriew bnai hapoh ka dabor plastic. Jia ryngkhat ba utei u khunlung mynta u la kylla long u rangïalehkai ba ki nongkyrshan ki ieid bad sngewtynnad bha jong ka Spain. Ka kyrteng jong u, u Lamine Yamal.
ïa katei ka dur ba la shon ha u snem 2007 la buh kyrpang da u kpa jong u Yamal la bun bun snem.
Mynta une u samla ïalehkai ba dang 19 snem ka rta, un aireng pyrshah ïa u Messi ha ka phainal jong ka FIFA World Cup 2026 ka ban long shibit shiteng synñia (20 tarik Naitung 2026), ha MetLife Stadium.
Katkum ka jing ong u Yamal, ban ïakhun pyrshah ïa u Messi bad ka Argentina ha ka phainal ka dei kawei na ki jingangnud jong u shuwa ban sdang ïa ka lympung.
Une u rangïalehkai ba shakhmat ba mynta jong ka Barcelona u la dep ban thep hynñiew kol bad 13 tylli ki assist ha ka jingïalehkai na ka bynta ka ri, kynthup ïa kawei ha kane ka lympung ka ban kut shibit ka shiteng synñia, ha kaba un kyrmen ban ïarap ïa ka Spain ban jop ïa ka nam lahduh kaba ar.
Ha kawei pat ka liang, u Messi, un kyrmen ban jop ïa ka nam lahduh kaba arsien lynter jong ka World Cup bad mynta u dei u lamkhmat ïa ka thup ki nongthep kol ba bun tam ha kane ka lympung da 8 tylli ki kol (ryngkat bad 4 tylli ki assist).
Khyndiat haba phai sha ka dur kaba la shon ha u snem 2007, kadei kaba la shim ha ka prokram shon-dur ïa ka kalendar jong ka UNICEF bad ka Barca Foundation kaba bun ki la klet, hynrei ka la mih paw biang hadien ba u kpa jong u Yamal u la buh ïa ka ha ka Instagram ha ka taïew ba la dep da kaba thoh ryngkat ki kyntien kiba ong “the beginning of two legends” lane ka “ka jingsdang jong ki arngut ki khanatang.”
Kane kan dei ka sien kaba nyngkong ba u Messi bad u Yamal kin ïakynduh kum ki liang pyrshah ha ka jingïalehkai phutbol bar ri.