Ym lah ban len ba ka la don ka jingroi kaba stet bha ha ka ka jingkiew ki kam sniew khamtam lei ka jingkynrei jong ka kam khaii bad jingdih pha ka jingpynjot kaba khraw bad uba long u nongshun ba shyrkhei tam jong ka imlang sahlang ha kine ki sngi kiba mynta. Kito kiba ju peit bha ïa ki khubor ha ka pyrthei bad ka jingshyrkhei jong u Drok khamtam ha ki surok jong ka ri America ha Philadelphia kim phylla shuh bad kumno u drok u lah ban pynlong ïa ka jingim jong ki briew tang kum ki snaïap. Ha katei ka jaka ki briew shisien ba ki la ngat ha ka jingbang jong u drok kim ju kwah shuh ban dang ïashong ïasah lang bad ki bahaïng ha sem, namar ba ka jingkwah jong ki kam long shuh kum ki briew hynrei ka la long kham palat wat ban ïa ki mrad lah ban ong.
Kane ka jingsniew jong u drok ka lah dei kum kawei ka khlam ne epidemic kaba la sar shsisha ia kiba bun ki bynta jong ka pyrthei bad mynta ngi sakhi ïa kane ka khlam drok hangne hapoh jong ka nongbah Shillong. Ha kine ki shisnem arsnem ka la buh jingsyier shibun eh ïa ki kmie ki kpa ban ïohsngew bad tip shaphang kata ka jingroi stet jong kata ka jingsniew jong u drok hapoh ki dong bad ki shnong jong ki thain bapher bapher ba ym satia tang hangne ha ka nongbah Shillong, hynrei la ioh sngew ruh ba u la sdang wat ban ïoh jaka wat sha ki thaiñ ba dang kham long nongkyndong ruh.
Hynrei ka la long ka khubor jong ka jingkyrmen ban ïohi ba ka seng Hynniewtrep Youth Council (HYC) ka la phai khmat sha kane ka bynta jong ka imlang sahlang bad pynbna syndon kum ka thma ban rat dyngkhong ïa kane ka jingsniew jong u drok. Ha kane ka taïew ba la dep la ïohi ïa ka jingsdang jong ka jingtrei bad ka jingshakri ba radbah jong ka Seng ha kaba la pyni shisha ïa kata ka mynsiem jingkitkhlieh na ka bynta ka imlang sahlang bad khamtam kane ka jaidbynriew rit paid jong ka Bri U Hynniewtrep. Ka jingmih pyrthei jong kane ka seng ka la buh pat ïa uta u dak ban sangeh pyrkhat bad shisha ka jingkyrmen kan dang ïoh jaka mo ha kane ka nongbah baieit jong ngi bad ha ka Bri u Hynniewtrep hi baroh kawei.
Kum ki riew paidbah hi wat la kim ïoh lad ban ïadon bynta lang bad ha seng ha kane ka kam kaba ratbah, hynrei baroh ki pynpaw ïa ka jingkyrshan kaba khlaiñ halor kane ka kam babha jong ka seng. Hooid shisha ka long kaba lyngngoh ban ïohi ba wat ka sorkar kam lah ban peitngor lem bad shim jingkitkhlieh ban weng ïa kane ka jingsngiew wat la ka don ïa baroh ki lad bad ki lynti kumno ban iakhun pyrshah ia kane ka jingsniew. Hynrei ki nongialam bad ki dkhot jong ka seng khlem kheiñ ïa ka jingma jong la ka jong ka jingim, ki aiti ïalade na ka bynta ban ïakhun thma pyrshah ïa ki briew kiba long ka nongrim baskhem jong ki kam sniew bashyrkhei jong u drok.
Ngi la ïohi ba ha kine ki sngi ka la mih shibun ka jingbymshngaiñ shuh ha ka leit ka wan bad ka trei ka ktah namar ka jingjyllei jong ki kam lute bad khhnieh jubor wat ïa ka pisa bad ka kamai kajih ba ki briew ki trei shitom ban pyndap pynbiang ïa la ka jong ka iing ka sem. Ka daw baroh ka dei na ka jingjyllei jong u drok ha kaba kito kiba pyndonkam ia u ki hap ban khieñ duh ïalade bad tuh bad lute naphang kat kaba jan tang ban pynbun ïa kata ka jingbrai jong ka jingkyrni dih drok jong ki. Namar ba ki briew kiba la kyrni ha u drok u la long kham palat ïa ka ja ba ngu ju bam hi lada kim duh tang kawei ka siendih ruh ki don ha ka jingsaja kaba khraw dei na kata ka daw ba shisien ba la ngat ki hap ban ïai im kyrni beit bad ka long kaba jwat haduh katta katta ba kin lait pat na ka bih jong une u jingsniew ba shyrkhei.
Baroh ngi tip ba ban ïaleh pyrshah ïa u drok ka dei ka kam kaba ma wat ïa ka jingim briew ruh namar ba ki briew kiba leh ia kata ka kam ki dei ki riew khieñduh. Hynrei da ka jingïatreilang jong baroh ki nongshnong shnong kiba don ïa ka jingkitkhlieh ngi kyrmen ba yn lah ban wanrah pat ïa ka jingkyrmen ha ka imlang sahlang bad khamtam ha kane ka ri baieit u Hynniewtrep kaba la ju ong ka ri tip briew tip Blei. Ngi kitbok ruh ïa ka Seng HYC kaba la shim khia ïa kane ka bynta kaba kongsan eh jong ka imlang sahlang ba kin lah ban nangïohbor bad shakri khambha na ka bynta ka ri bad ka jaidbynriew hi baroh kawei bad yn lah ban rat dyngkhong syndon ïa kane ka jingsdang khie rashong jong u drok ha kane ka rilum Khasi Jaintia baieit jong ngi.