NEW JERSEY, Naitung 18: U President jong ka USA, u Donald Trump, un sa wan ban sakhi ïa ka jingïalehkai phainal jong ka FIFA World Cup 2026 hapdeng ka Argentina bad ka Spain ha New York ban long shibit shiteng synñia, la ong ka secretary jong ka White House ka Karoline Leavitt ha ka sngi Palei.
Ka jingïakhun phainal kan long ha madan ïalehkai ha New York/New Jersey stadium.
U Trump u la don lang ruh ha ka phainal jong ka FIFA Club World Cup ha u snem ba la dep hapdeng ka Chelsea bad ka Paris Saint-Germain, ha kaba u Trump u la aiti ïa ka trophy sha ka kynhun ïalehkai jong ka Premier League, kaba la rah ïa ka nam lahduh.
“Ngi khmih lynti ïa kane ka jingïalehkai ba khatduh ha ka Sngi U Trai (shiteng synñia jong ka sngi Nyngkong ha India), bad nga tip ba u President u khmih lynti ban wan,” la ong ka Leavitt ha ka jingïalang sha ki lad pathai khubor.
“Ka jingwan jong u kan pynkut noh ïa kaei kaba la long ka World Cup kaba bun bha ki nongpeitkai, kaba shngaiñ tam, bad kaba jop tam ha ka histori jong ka America.”
Ka Leavitt ka la bynrap ba kam tip la u Trump u don ne em ïa ka kynhun ba u kyrshan ha ka phainal hynrei ka la pynshlur ïa ki lad pathei khubor ban kylli ïa u. “Nga thikna ba un don ka jubab kaba sngewtynnad na ka bynta jong phi,” ka la ong.
