Nongpoh, Jylliew 26: Ha kane ka juk kaba bun naki samla naduh sor haduh nongkyndong ki ngop ha kiba bun jait ki jingdih buaid khamtam u drok uwei naki nongshun ba khraw ka iing ka sem bad ka imlang ka sahlang, ka jinglehkai bad ka jingkilan met kadei kawei naki lad ba ki samla kidei ban pynsngewbha ïalade bad ïaka met ym da ki jingdih buaid.
Kane ka dei ka khubor haka jingrakhe ïaka International Day Against Drug Abuse and Illicit Trafficking kaba la pynlong mynta ka sngi da ka ophis u District Sports Officer ka Ri-Bhoi District haka jingïatreilang bad ka District Social Welfare Officer bad kumjuh ruh ka Ri-Bhoi District Basketball Association kiba la pynlong ruh da ka jinglehkai basketball ba shisngi ha madan ïalehkai ka Alpha English Higher Secondary School, Nongpoh.
Ha kane ka sngi la wan ban sakhi lang ïa ka jingïalehkai da u Bah G.L.C. Mylliem, Assistant Commissioner ka Ri Bhoi District kum u kongsan, haka jingdonlang ka Kong N.F. Sunn, District Social Welfare Officer, u Bah Bobby L. Nongbet, DSO Ri Bhoi, ka Kong Naphi Shisha Marwein, Vice President ka Meghalaya Basketball Association lem bad kiwei kiwei.
Kiba bun naki nongkren ha kane ka sngi kila ong ba bun naaki samla ki sdang ban mad ïa u drok lyngba ki paralok da ka jingthmu ban lehkmen bad leh sngewbha, hynrei u kynjri u la ap lypa ïaka jingim ba dang sah jong ki bad eh ban bthat ïa u, hynrei ki don bun rukom kiba pynsngewbha ïaka met bad ka jinglehkai bad kilan met ka dei kawei naki dawai ba ki samla kin isih ïa kitei ki jait jingdih bad ban im ka jingim kaba beit bad ka imlang ka sahlang kaba lait na u drok.
Haba phei sha ka jingïalehkai Basketball bala pynlong ha kane ka sngi, la sakhi ïa ka jingïakhun kaba itynnad hapdeng ka kynhun jong ka Ri Bhoi College pyrshah ïa ka Ri Bhoi District Basketball Association ha kaba ka Ri Bhoi District Basketball Association ka la lah ban khur ïa ka jingjop da kaba pynliem ïa ka Ri Bhoi College da 24-15 basket.
Kum ka dak jong ka jingai mynsiem ïa ki nongïalehkai, naka liang ki bor pynïaid ki la sam ruh ïa ki khusnam bad ki trophy ryngkat ka song pisa sha baroh ar tylli ki kynhun ba la shim bynta ha kane ka jingïalehkai Basketball.
