Da ka buit treikam jong ka Telangana Integrated Command and Control Centre kwah u Conrad ha Meghalaya

Shillong, Jylliew 25 : U Myntri Rangbah ka Jylla, Conrad K. Sangma, u la pynpaw ïa ka jingkmen kaba khraw hadien ba u la wan ban jurip ïa ka Telangana Integrated Command and Control Centre kaba don ha Hyderabad ban sakhi markhmat ïa ka rukom treikam jong kane ka Centre kaba la pawnam ha ka Ri.
Haba pynpaw ïa kane hadien ka jingjurip, u Myntri Rangbah u la ong ba ka rukom treikam ha kane ka Centre ka pyni shynna ba kumno ka jingpyndonkam pura ïa ki kor teknoloji da kaba treilang bad ki tnad bapher bapher ki lah ban wanrah ïa ka rukom treikam kaba ryntih bad kaba ai jingmyntoi bad jingshngain ïa ki paidbah.
“Nga sngewkmen haduh katta katta ban ïohi ïa ka rukom treikam ha Telangana Integrated Command & Control Centre, Hyderabad. Na baroh ki IC&CC kiba paw ha ka Ri, ka pyni ba kumno ka jingpyndonkam ïa ki kor teknoloji bad ka jingtreilang jong ki tnad bapher bapher ka lah ban wanrah ïa ka jingtreikam kaba paka bad kaba ai ka jingmyntoi kaba khraw ïa ki paidbah,” u la ong.
U la ong ruh ba kane ka Integrated Command and Control Centre ka long ka nongmuna kaba paka tam na bynta ka Meghalaya ban bud lang na ka bynta ban pynjanai shuh shuh ïa ka jingshakri ïa ki paidbah.
“Kane ka Centre ka long ka nuksa kaba bha tam na ka bynta ki jylla bapher bapher ha ka ri, kynthup ïa ka Meghalaya, ha kaba pyndonkam ïa ka teknoloji ban pynkhlaiñ ïa ka synshar paidbah bad ban pynjanai ïa ka jingshakri sha ki nongshong shnong,” u la bynrap shuh shuh.
Ha kane ka jingleit ban sakhi hi markhmat ïa ka rukom treikam jong ka Centre, u Myntri Rangbah u lapynlut por ruh ban sngap ïa ka jingbatai kaba bniah na ki ophisar kiba dei peit.
Lah ban kdew hangne ba ha kane ka ka Centre baroh ki shnat treikam ki wan lang ha kawei ka shatri la ka long naduh ka tnad pulit, ka tnad ba peit ïa jinglyngshop mariang, nangta ka tnad ba peit ïa ki lad ai jingïarap ba kyrkieh, ka cyber security bad kiwei kiwei.
Nalor kane ka peitngor ruh lyngba ki kor ki bor ïa kaei kaba jia ha kylleng ki bynta jong ka jylla kynthup naduh ka ïaid ka ieng ki kali, ki jaka paidbah bad kiwei kiwei.