Pynrem jur ka Ladrymbai-B SC ïa ka jingpynkheiñ aiñ ka EJDCA ha ka District Level Knockout Tournament 2026

Khliehriat, jylliew 26: Ka Ladrymbai-B Sports Club, ka pynrem jur ïa ka jingpynkheiñ aiñ ka East Jaiñtia Hills Criket Association (EJHDCA) kaba la pynlong ïa ka District Level Knockout Tournament 2026 kaba la sdang naduh ka 20 tarik u bnai jymmang 2026.
Katkum u kyrwoh la ong ba ha ka por ba iakhun ïa ka Semi-Final hapdeng ka Ladrymbai-B Sports Club bad ka Deiñ Chynrum Criket Club (CC) ha madan Mookhep Play Ground la lap ba ka Deiñchymrum CC ka la pynmih madan ïa ki lai ngut ki nongialehkai kiba na bar ka district bad kane ka la dei ka jingpynkheiñ ia ki kyndon, ki aiñ jong ka Rule-16 jong ka EJDCA Rules & Regulations bad ruh ha kane ka lympung ka Ladrymbai-B Sports Club ka la shah pynliem da 12 run bad ong ba kane ka jingrem ka Ladrymbai-B Sports Club ka dei ka bym lah ban pdiang.
“Watla ngi la dep phah da ka shithi ujor kaba katkum ka Letter No.15, dated 20/05/2026 kaba hap ban siew hynrei ka kam treh ban pdiang ïa kane bad la dep khot ruh ban iakren ha Dkhiah naduh ka 8 tarik mynta u bnai jylliew hynrei ngi ka Ladrymbai-B Sports Club ngi khlem ioh pdiang satia kano kano ka jubab ne ka shithi haduh mynta, myn ha ka 15 tarik mynta u bnai jylliew ngi na ka liang ka Club ngi la leit pynsngew ïa kane ka kam sha u Deputy Commissioner, East Jaiñtia Hills District lyngba ka shithi (Letter No.LBSC/Comp/EJDCA/2/2026), ha kaba la kyrpad ba dei ban pynsangeh shwa ïa ka jingiakhun Final, hynrei ka East Jaiñtia Hills Criket Association (EJHDCA) ka la iaid shakhmat pynban bad pynbna ïa ka jingiakhun Final kaba yn pynlong ha ka 26 tarik mynta u bnai hapdeng ka Deiñchymrum CC pyrshah ïa ka Lumshnong Block ha madan RBDCA Ground, ha Ribhoi District, kumta na ka liang ka Ladrymbai-B Sports Club ngi pyrshah jur ïa kane” ong u kyrwoh.
Shuh shuh ka Ladrymbai-B Sports Club ka kynnoh ba kane ka jingleh ka EJHDCA ka long kaba ym lah ban pdiang bad ka la phah ruh da ka jingthoh da ka Meghalaya Cricket Association, ha ka shithi ba la phah sha ka Meghalaya Cricket Association ba la aoi da u President Ladrymbai B Sport Club, u bah Chanki Shylla bad u Secretary u bah Edward Chyrmang, ka Club ka la kyrpad ia ka Meghalaya Cricket Association ba kan shim khia lem ïa kane ka kam namar ka jingpynkheiñ ïa ki kyndon, ka pynkheiñ ïa ki aiñ Rule-16 ka EJHDCA, kumjuh ruh ban tuklar lem khnang ba ka jingialehkai ïa kane ka District-Level Tournaments kan long ha ka rukom kaba iaid beit iaid ryntih hapoh East Jaiñtia Hills District, ka Ladrymbai-B Sports Club ka kyntu ruh ïa ka Meghalaya Cricket Association ba kan bthah ïa ka East Jaiñtia Hills Criket Association ba kan pynjlan shwa ïa ka jingiakhun final haduh tat haduh ban da la lah ban ïa pynbeit.