Jowai, Jylliew 25: Ka District Social Welfare Officer (DSWO), West Jaiñtia Hills District, ha ryngkat ka jingïatreilang u myntri ba peit ïaka koit ka khiah bad ka kam ïalehkai Sports ka sorkar jylla u ma W. Shylla, hynnin ka sngi 24 tarik kila pynlong ïaka Veterans Friendly Football Match hapoh ka Nasha Mukt Bharat Abhiyaan 2026.
Ïa kane ka jingïalehkai phutbol la pynlong ha madan Wahiajer bad la sdang haka por 3 baje janmiet, la wan ban ïashim bynta lang da ki riewrangbah kiba la heh ka rta bad ki dkhot nongïalam shnong, kum ka dak ban kyrshan ïa kane ka prokram pyrshah ïa ka jingdih drok haka ri baroh kawei.
Ha kane ka sngi la pynlong ïaka prokram ba lynkot, da kaba pynsngew shaphang ki jingma kiba mih na ki jingdih buaid, ban kiar ïa kane la kyntu ïa ki khun samla ban shim ïa ki jingïalehkai hakhmat eh, ka rukom im kaba koit ba khiah bad ban ïatreilang haka imlang sahlang da kaba ïaleh pyrshah ïa u drok.
Ki la ban jur shaphang ka jingïalehkai kawei na ka atiar kaba khlaiñ haka koit ka khiah, kaba wanrah ka jinglong ryntih bad ka jingïatylli lang kawei, da kaba kyntu ïa ki samla ban kiar katba lah na u drug u jingdih ba sniew tam ha ka jingim.
La sam ruh ïa ki khusnam sha baroh ki nongïalehkai kiba la wan ban ïashim bynta, kum ka dak ban kyrshan ïa ka Nasha Mukt Bharat Abhiyaan 2026.
