Shah jied ka Riiohlang Dhar ban long match official ha ka FIFA U-20 Women’s World Cup

Shillong, Jylliew 26: Ka Riiohlang Dhar kan sa ïohlad ban jam sa uwei pat u mawjam hadien ba ka la shah jied kum ka nongpynïaid ïa ki ïalehkai lane match official na ka bynta ka FIFA U-20 Women’s World Cup 2026, ka ban sa long ha Poland ha u Nailur.
ïa kane ka la pynbna da ka All India Football Federation ha ka rynsan social media.
Hadien ba ka la ïoh ban don bynta ban pynïaid ïa ki jingïalehkai ha ka lympung U-17 Women’s World Cup ha u snem 2024 ha Dominican Republic, kane kan dei ka sien kaba ar na ka bynta ka Riiohlang ban don bynta haki lympung ïalehkai jong ka FIFA, ka assistant referee kaba la ïoh jingithuh da ka FIFA, “kaba dang bteng ban long ka jingai mynsiem ïa ka pateng ban wan jong ki nongpynïaid jingïalehkai jong ka ri India,” ong ka AIFF.
Ka Riiohlang ka la don bynta kum ka nongpynïaid (match official) ha kiba bun ki lympung ïalehkai bar ri ha kine ki snem. Ha u snem 2024 ka la shah jied ruh kum ka nongpynïaid ha ka AFC U-17 Women’s Asian Cup ha Indonesia bad mynta u snem ka la long kum ka nongpynïaid ha kane kajuh ka lympung ha China.