Shillong, Nailar, 12: U Bah Granarysterfield Thangkhiew para jong u Bah Cherishterfield Thangkhiew, uba dei u General Secretary barim ka HNLC uba la shah siat ïap ha ki pulit, u la ïathuh ba na ka liang ka sorkar ka la pyrshang ban pynsngap jar noh ïa ka ïing ka sem da kaba tyrwa da ki kam Sorkar bad ka pisa.
Ïa kane u Bah Granary u la ïathuh haba ïakren bad u Mawphor ha ka 12 tarik Nailar 2022 ha ka ïing sah jong u ha Mawlai Kynton Massar. “Shuwa ba ngin ïaid noh sha ka ïing bishar Meghalaya High Court ka Sorkar ka la tyrwa da ar tylli ki kam Sorkar bad ka pisa hynrei ngim pdiang namar lada ngi pdiang kamut ba ngi la sngap jar noh ban ym ïakhun shuh ban ïoh ïoh ïa ka hok. Lada ka Sorkar ka ai da ka mon sngewbha ngi shim hynrei kadei tang ka buit ban pynsngap jar noh,” ong u Bah Granary.
U Bah Granarysterfield Thangkhiew u la ïathuh ruh ba ka sorkar lyngba u chief Secretary ka la phah briew ban wan ïakynduh ïa ki ban tyrwa kam sorkar bad da ka pisa. La ïathuh ruh ba ka Sorkar ka la shu tyrwa kam bad pisa khlem ka jingthoh. “Nga la telephone ïa u Chief Secretary bad kylli la hato kadei ne em kaba shisha bad ma u ruh u la kubur ba kadei kaba shisha. Kumta nga ka ong ban da ai da ka jingthoh hynrei ym shym la treh,” la ong u Bah Granarysterfield Thangkhiew.
U la ïathuh ba na ka jinngbym leh eiei jong ka sorkar ïa ka ejahar ba ki la ujor ha Mawlai Police Station ka pynlong ïa u bad ka ïing ka sem ban leit ujor noh sha ka ïing Kashari jong ka Meghalaya High Court ban ïoh ka jingbishar kaba hok.
U Bah Granary Thangkhiew u la ïathuh ba na ka liang ka ïing ka sem kan sa pynlong ka jingkynmaw burom ïa ka jingdap 2 snem jong ka jingkhlad u Bah Cherishterfield Thangkhiew ha ka 13 tarik Nailar 2023 da kaba leit buh syntiew ha u lum jingtep ha ka por 2 baje janmiet.
Kum ban pynkynmaw hangne, u Bah Cherishterfield Thangkhiew general secretary barim ka seng HNLC u la shah siat ïap ha ki pulit ha ka step jong ka 13 tarik Nailar 2021 ha la ka jong ka ïing sah ha Mawlai Kynton Massar bad la tep don burom ha ka 15 tarik Nailar kaba dei ruh ka sngi laitluid jong ka ri India ne ka Independence Day.
