Ka jingpyntreikam kyrkieh ka NEHU ïa ka NEP kan wanrah ka jingma ïa ki samla pule : MCTA

Shillong, Aug 12 : Ka jingrai ka North Eastern Hill University (NEHU) ban pyntreikam noh mardor ïa ka National Education Policy (NEP) naduh une u snem pule 2023-24 ka la pynmih ïa ka jingshah kynthoh kaba jur na ka Meghalaya College Teachers’ Association (MCTA), kaba la kynnoh ba ba kane ka jingleh kadei ka bym shngaiñ bad kaba ka jingma ka ap ïa ki samla pule.
Ka MCTA ka dang bteng ïa ka jingïakhih ban pyrshah jur ïa ka jingpyntreikam hak-dak ïa ka NEP 2020 ha baroh ki College kiba don ha Meghalaya kiba pynïasoh bad ka NEHU.
U Bah Airpeace W. Rani, General Secretary ka MCTA, ula pynpaw ba ka jingshim rai ki bor pynïaid ka NEHU ka la buh dak jingkylli ïa ka jingshngaiñ bad kaba buh ha ka jingma kaba khraw ïa ki samla pule.
U Bah Rani, ula ong ba ka rai ban pyntreikam ïa ka NEP naduh u 2023-24 kadei ka bym shngain namar kam dei kaba la mynjur da ka Academic Council, ka kynhun kaba la shah pynkup bor ha kaba ïadei bad ki kam pule puthi.
“Ka long ka bym shngain namar kam dei kaba la mynjur da ka Academic Council kaba dei ka kynhun ka ban shim ïa ka rai ha kaba ïadei bad ki kam kiba ïadei bad ka pule puthi” la pynpaw u Bah Rani ha ka kyrwoh khubor.
Ka MCTA ka la pynpaw ïa ka jingsngewkhia halor ka jingshim rai kyrkieh, watla ka Academic Council ka la don lypa ïa ka jingthmu ban pyntreikam ïa ka NEP naduh u snem 2024-25, u Vice-Chancellor bad u Officer on Special Duty, College Development Council, ki la pynmih mardor ïa ka jingbthah ban pyntreikam noh ïa ka NEP bad kane kala wanrah pynban ïa ka jingkynthoh halor katei ka jingthmu ka jongki.
Ka MCTA ka la pynpaw ïa ka jingsuba jur ba ka jingshim ïa katei ka rai ka dei ban pynhun ïa ki heh saiñ pyrthei kiba don ha New Delhi.
U Bah Rani ula kynnoh, “U Vice-Chancellor, ka paw ba u kyrkieh bha ban pynhun ïa ki heh saiñ pyrthei ha New Delhi. Lah ban kdew ba u Vice Chancellor ula shah thung ha ka sorkar pdeng khlem da phaikhmat ïa ka jingsngew bad ïa ka jingangnud jong ki trai ri”.
Ka jingleh kyrkieh ban pyntreikam ïa ka NEP kala pynlong ruh ïa ki nonghikai ban buh jingkylli pyrshah ïa ka bor jongka Academic Council bad halor ki jingduna ha kaba ïadei bad ka jingpynkhreh ki nonghikai.
Ka MCTA kala ban jur ïa ka jingduna ha ka jingpynkhreh, kynthup ïa ka Syllabus ka bym pura na ka bynta ki katto katne ki undergraduate programs kum ha ka Music bad Business Administration. Lane ka pyni ba ka NEHU kam pat long kaba la pynkhreh ban pyntreikam ïa ka NEP 2020 bad ka la pynmih ruh ïa ki jingkylli halor ka jingleh shilliang ha ka jingpyntreikam ha kajuh hi ka jaka pule.
Watla ka NEHU ka la pynpaw ba ka jingpyntreikam ïa ka NEP ka dei na ka bynta ka bha ka miat ki samla pule, hynrei ka MCTA ka la pynpaw ïa ka jingsngewkhia halor ka jingleh kyrkieh. Ka la pynpaw ba ka Batch ba mynta ki lah ban mad ïa ki jingeh kiba khraw namar ka jingduna palat ha ka rukom pynkhreh.Ka MCTA ka la kdew ba ka jingpynslem ka NEHU ha ka ban sam ïa ka Ordinance kaba ïadei bad ka NEP bad ka Syllabus ka long ka bynta jongka jingdkoh ha ka rukom pynkhreh.
Ka MCTA ka la pynpaw ruh ba kan don ka jingktah na ka jingpyntreikam ka bym long ryntih lang da baroh ki college khamtam.ha ki thaiñ nongkyndong. Ki Library, jingbym pat kloi ki nonghikai bad ka course syllabus ki dang sah ka jingbym pat shimkhia haduh mynta.Ka jingban jong ka kam ia ki nonghikai kan dang ïai khia bha, khlem ka jingpynkhreh ïa ki jingthmu ban thungkam shuh ne kino kino ki jingpynkhreh kiba biang.
Ka association ka buh jingkylli ruh ïa ka jingsngap jar ka NEHU ha kaba ïadei bad ka pisa pilaiñ ha ka jingpyntreikam ïa ka NEP, khlem kano kano ka jingshai ha ka jingai jingkyrshan ïa ka pisa tyngka na ka liang ka sorkar pdeng ne sorkar jylla, ka MCTA ka pynpaw ïa ka jingsngewkhuslai halor ka jingkiew jong ka bai pule ha ki college shimet kaba ktah bha ïa ki samla pule na ki thaiñ nongkyndong bad kan ïalam ruh sha ka jingjur jongka jingsangeh pule.
Ka MCTA ka la buh jingkylli ruh ha kaba ïadei bad ka jingpyntreikam ïa ki kor ki bor katkum kane ka juk kaba mynta ha ka jingai jinghikai lyngba ka jingpyntreikam ïa ka NEP, ka jingbym don ïa ki kamra treikam la ka jong na ka bynta ki nonghikai ban leh ïa ki Online Class bad ki la pynpaw ruh ïa ka jingtakhuh hapdeng ka jingpynbiang ïa ki jingdonkam bad ka jingduna ka NEHU ha kaba ïadei bad ka laiñ ban pynkhreh.
Ka association ka pynrem jur ïa ka jingleh kyrkieh ki Principal jong ki College ha ka ban kylla ïa ka nongrim ka jongki ha kaba ïadei bad ka jingpyntreikam ïa ka NEP bad ki la kynthoh ïa ka Meghalaya College Principals’ Council halor ka jingkylla ïa la ka nongrim kaba ki ïeng.
Namar kitei ki jingsngewkhia baroh, ka MCTA ka la sangeh ban shim klass ïa kiba pule ha ka First Semester hapoh jongka Four Year Under Graduate Programme (FYUP) bad ki la sdang ïa ka Non-Cooperation Movement pyrshah ïa ka NEHU naduh ka 1 tarik u Nailar 2023.