Nongpoh, Jymmang 16: U Bah CB Syiem u ba dei u MDC barim ka Nongpoh Constituency um pat kren shai haduh mynta la un ïakhun ne em na Mawhati Constituency watla u la sdang ban rung sha ki shnong jong ka thaiñ Mawhati Constituency bad ki khubor hamsaia kila her ba u don ka jingthmu ban ïakhun na Maw hati Constituency ha elekshon sha ka iing Dorbar thaw aiñ ka jylla ban long ha u snem 2023.
“Ïa mynta ngam pat don eiei ban ong ha kaba ïadei bad ka elekshon 2023 namar nga dang don ha ka lynti bad lada ki paidbah ki imon ïanga ngan mih madan beit katba ka met jong nga ka dang koit dang khiah bad ka dang ban shah ban shakri sha ki paidbah” la ong u Bah CB Syiem da kaba bynrap ruh ba ka shong haka rai jong ki paidbah bad ki nongkyrshan jong u lada ki ibit ban long kum u nongmihkhmat jong ka Constituency un pdiang bad un ïaid beit shakhmat ban aireng ha ka elekshon 2023 bad ïaka party kaba un ïakhun yn sa shim rai kat kum ka jingai jingmut lang ki riew rangbah hadien bala dep ruh ban thaw ïa ka Mawhati Constituency Socio & Economic Forum.
U Bah CB Syiem u dei ruh u ba shong ba sah haka shnong Umbuda ha Nongpoh, hynrei ka daw kaba la pynlong ïa u ban phai khmat sha ka thaiñ Mawhati ka dei namar ka jingsahdien shaba palat jong katei ka constituency haba nujor bad kiwei bad u kwah ban wanrah ki jingkylla lada ki paidbah ki ibit bad kyrshan ïa u ban mih shakhmat ha kane ka elekshon ban wan kumba ki ka dei ruh ka thaiñ kaba u don ka jingïadei kaba jan bad ki paidbah namar ki kmie ieid, kmie rad ki dei na ka thaiñ Mawhati bad um don jingsngewpher shuh namar u dei u wei naki riew rangbah u ba la trei haka thaiñ Ri-Bhoi baroh kawei.
Namarkata u la kren shai ba ka rai ba khatduh ka dei ka jingkyrshan jong ki paidbah ïa mynta um pat kren shai eiei la un ïakhun ne em na Mawhati hynrei ki dak ki shin ki paw ba utei u rangbah u don ka jingthmu ban ïakhun na Mawhati Constituency.
