Jowai, Jymmang 16: U Chairman ba thymmai ka Jowai Municipal Board (JMB) u ma Lasooki Lakiang mynta ka sngi haba ai jingkren sha ki lad pathai khubor ula ong hadien ba ka tnad Municipal ha ryngkat ka jingïaphylliew jingmutlang bad ka CEO kila rai ban wad ki lad ki lynti halor kumno ban pynduna ka jingpynmih ñiut da kaba bynta ïa ki na kiba pyut bad ki bym pyut.
Ula ong ba kane ka jingpynbynta ïa ki ñiut kiba mih na ki ïing ki sem bad kumjuh na ki ïew ki hat ka lah ruh ban kham pynsuk ban leit theh ïa ki ñiut ha kino kino ki jaka ba la dep pynbeit.
Haduh mynta ym ka JMB kam pat ïoh ïa ka jaka bret ñiut ba paka bad ki dang don bun ki shnong ki bym pat dep shim ïa ki ‘Bin’ ne ki borti thep ñiut kiba don ar rong bad kine ki Bin ki dang neh sah ha katei ka ophis.
U ma Lakiang ula ong ka JMB ban leh ïa kane kum ka jingpyrshang ban wad ki lad ki lynti ha ryngkat ka jingïarap na ki kynhun treimon sngewbha ban leit pynsngewthuh sha ki paidbah nongshong shnong ba kin tip ban pynïakhlad ïa ki ñiut na ki ïing ki sem jong ki bad kane kan kham pynduna ïa ka jingmih ki ñiut ha kylleng ki jaka.
U Dr. H.H. Mohrmen ula ong ba ka Solid Waste Management Rules, 2016 kala kren shai baroh dei ban pynïakhlad ïa ki ñiut bad ha ka juh ka por kan ïarap ban pynkylla sboh na ka bynta ka rep ka riang. Katba ïa ki kynja ba long plastic dei ban leh ai ha ki Factory kum ha ki karkhana dewbilat ban pynmih ïa ka energy kaba long katkum ka kyndon aiñ.
