Shillong, Lber, 01: U nongïalam ka BJP u Bah Alexander L. Hek uba la long u MLA haduh san sien kynthih na Pynthorumkhrah Constituency u la ong ba yn ym don kano kano ruh ka party ka ban jop palat 15 seat ha kane ka elekshon ba dang shu dep long shen.
U Bah Hek u la ong ruh ba yn ym don kano kano ruh ka party kaba lah ban thaw sorkar tang marwei bad pynpaw ruh ba ka jingpyrkhat jong ki paidbah ka kham pher.
“Ki la don bun tylli ki jingïathuh lypa (exit polls),ngam shahniah hi ruh ïa ki,” ong u Bah Hek.
Katkum ka jingïathuh lypa jong u, yn ym don kano kano ka party ka ban jop palat 16 seat ha kane ka elekshon. U la ïaiban ruh ba kane ka dei tang ka jingsngew jong u, lehse ka lah ruh ban ym long kumta.
Haba kylli halor ka jingïakynduh jong u National President ka NPP u Conrad K Sangma bad u Convenor jong ka North East Democratic Alliance (NEDA) u Himanta Biswa Sarma ha ka 28 tarik, Rymphang ha Guwahati, u Bah Hek u la ong ba kam don kano kano ka jingeh ban ïakren bad kano kano ka seng saiñpyrthei lane ïa ki nongïalam ban thaw ïa ka Sorkar, hynrei ka party hi kan sa shim ïa ka rai badno yn thaw ïa ka Sorkar.
“Ka party kan sa thaw ïa ka Sorkar bad ki party kiba don kajuh ka jingmut kiba lait na ki jingshah kynnoh bamsap.”
Haba kylli, hato ka BJP ka long neem kaba kloi ban ïatreilang bad ka TMC lane ka Congress ban thaw ïa ka Sorkar, u Bah Hek u la ong, ba ka jingkhang jong ka BJP ka plie borabor bad kan ïatreilang bad kano kano ka party kaba kwah ban trei bad ka BJP ban pynlong ïa ka Meghalaya kaba phyrnai bad kaba kiew shaphrang.
