Shillong, Lber 01 : Ka United Democratic Party (UDP) Sohiong kala jied da ka kyrteng jong u bah Synshar Lyngdoh, u pyrsa trai jong u Maheh HDR Lyngdoh (Bam Kwai ha Dwar U Blei) ban mih bujli ha ka jaka jongu ban ïakhun ïa ka election MLA-2023 na Sohiong Constituency.
Ka Election Commission of India (ECI) ka la pynsangeh shwa ïa ka Election ha Sohiong Constituency hadien ka jingkhlad noh u kyrtong ka UDP u Maheh HDR Lyngdoh haka 20 tarik Rymphang 2023.
Haba kren sha ki lad pathai khubor, u President ka UDP East Khasi Hills District bah Titosstarwell Chyne ula ïathuh ba ïa ka kyrteng jong u bah Synshar Lyngdoh u ba dei ruh u pyrsa trai jong u bah HDR Lyngdoh la phah hi daka UDP Sohiong circle bad naka liang ka party kan sa shong pyrkhat bha hashuwa ban shim ïa ka rai ba khatduh.
U bah Titos ula ong ba hadien ka jingpynbna naka ECI haba ïadei bad ka tarik ban pynlong Election ha Sohiong konstitwensi, ka State Election Committee (SEC) jong ka UDP ruh kan sa shong jingïalang ban shim rai khatduh halor u kyrtong jong ka Party ban ïakhun ïaka Election.
“Nga la ïoh pdiang ïa ka shithi naka UDP Sohiong circle ha kaba, ki la phah ïa ka kyrteng jong u bah Synshar Lyngdoh u ba dei u pyrsa jong u bah HDR Lyngdoh ban mih bujli ban ïakhun ïa ka Election na Sohiong” la ong u bah Titos.
U bah Titos ula ong ba kum u president ka UDP East Khasi Hills District un rah ïa kane ka jingai jingmut ka UDP Sohiong sha ka SEC jong ka Party ba kan shim ïa ka rai ba khatduh
