Shillong, Nailar 24: Ha kaba iadei bad ka jingjia kaba la jia hynnin ka sngi ha Skul Laitumkhrah Presbyterian Higher Secondary School, Laitumkhrah, ki Pulit ka nongbah Shillong, ki la pynshai ba kam dei satia ka jingthmu rahbor, hynrei kadei tang ka jingsngewthuh bakla.
Katkum ka jingïathuh u Bah Vivek Syiem, SP City la ong ba mynta ka sngi ki arngut ki samla ki la shah kynnoh kum kita kiba thmu rahbor, ki la wan sha thanad Laitumkhrah hadien ba ki la ïohi ïa ka jingmih khubor. Ha ka jingtohkit ki Pulit, la lap ba kine ki la leit sha skul Laitumkhrah Presbyerian HSS ban leit shaw ia uwei u khun pyrsa uba shong Class KG bad ki la ai da ka kyrteng sin jong une u pyrsa ïa uba ki nonghikai kim tip satia ka kyrteng sin jong u.
Ka leit jia ryngkhat ruh ba ha katei kajuh ka class don sa uwei u khynnah uba don kajuh ka kyrteng bad ka kyrteng sin une u khynnah ba mut wan shaw kine ki arngut.
Nalorkine arngut kiba la paw ha ki CCTV hynnin ka sngi, ki kmie ki kpa jong baroh arngut kine ki khynnah bad kumjuh ruh i Principal jong ka Skul bad i Class Teacher jong ka Class ki la wan mih hakhmat ki Pulit bad na ka jingïakren bad ki, ki Pulit ki la lap ba kadei tang ka jingïasngewthuh bakla, kam dei satia ka jingthmu rahbor.
