Shillong, Nailar 24 : Ka Hill Farmer’s Union kaba dei ka kynhun jong ki nongrep hynne ka sngi ryngkat u jhur ha ki kriah ki la leit ban kynduh ïa u CEM ka KHADC Bah Pynïaid Sing Syiem kumjuh ïa ka Executive Member Market, Kong Grace Kharpuri ban pynpaw ka jingsngewnguh haba ïadei bad ka Market Act, kaba u Lat u la mynjur dang shen.
Katei ka kynhun ki nongrep hapoh ka jingïalam jong u Bah Commander Shangpliang kum u President ha ki la pynpaw ruh ka jingkhmih lynti ba katei ka aiñ ïew kan ïarap ïa ki nongrep haba ki leit ban die ïa ki mar rep jong ki nangne shakhmat.
“Baroh shi katta ka jingïai ud jongngi ki nongrep ka long ban pynduh noh ïa kane ka jingot kilo hynrei haba ym don ka aiñ kaba biang ka long ka jingeh ban pyntreikam. Kumta ngi wan ban ai khublei kyrpang ïa u CEM bad EM ka tnad Market,” ong u President ka HFU.
Shwa kane, u President ki nongrep u la ong ba ki nongkhaïi kim dei ban pynpaw ïaka jingsngewsih haba ki ïakhun ïa kane ka jingot kilo. “Ngim kwah ban don kano kano ka jingbuhnud bad ki nongkhaïi namar khlem ki nongkhaïi ngi ki nongrep ngim im. Kumta ngi ngeit skhem ba da kane ka ain kan pynduh noh ïa kane ka jingot kilo,” u la ong.
Shuh shuh u la pynpaw ruh ba ki sngewkmen haduh katta katta hadien ba ki la ïoh ïa ka jingpynshai na ka EM ba ha kane ka ain la bsuh lang ruh ïa ki kyndon ba kan don wat ka dor (minimum support price) kaba kum ki nongrep kin ym ngat ha ka jingshah khñiot dor than.
Haba bynrap lang, ka Executive Member ka la ong ba kum ka Executive Committee baroh kawei hapoh ka jingïalam jong u CEM, ki sngewkmen haduh katta katta ïa katei ka jingwan jong ki nongrep. “Kaba sah mynta ka long sa tang ban pyntyllun noh ïa ka kam shakhmat. Ngin pyntreikam da kaba pyrkhing bad kumta kum ka EM nga kyntu ïa ki nongkhaïi ba ki ruh kin sngewthuh lem ba kane kam dei kaba ngi leh shilliang khmat ïano ïano namar kane ka ain ka wanrah ïa ka jingsngewthuh jingmut hapdeng u nongrep bad u nongkhaïi,” ka la ong.
Ha kane kajuh ka sngi, ka HFU ka la leit ruh ban kynduh ïa u CEM barim ba dei ruh u nongïalam ka liang pyrshah ha KHADC, Bah Titos W Chyne ban pynpaw ka jingsngewnguh ïa u ruh namar dei ha ka por jong u ba la wanrah ïa ka kum ka Bill.
