Kawei ka sur kawei ka dur ïa tylli ki paid Garo bad Khasi ha Khappud ka Langpih Sector

Nongstoiñ, Nailar 24: Ka synjuk ki Nongshynshar Shnong Nongmynsaw Syiemship ka dap da ka jingsngew lyngngoh bad sngew kyndit, ban ïohi ha ki lad phathai khubor ïa ka jingkynthoh jong uwei na ki Sordar Shnong napoh ka Hima Nongmynsaw Syiemship u Bah P.Nongshlong, u ba la kren ha ki lad pathai khubor ba, ‘Ki paidbah Garo ha ki Shnong khappud kim kwah ban pynduh ïa ki EPIC na Assam.
Halor kane ka Synjuk ka pynpaw ïa ka jingbym sngew ïa hap bad ka jingpyrshah kaba jur ïa katei ka jingkynthoh, namar kane ka kam ka long ka kam ba la shu leh lyndet marwei jong u nongphah khubor, khlem ka jingtip lang jong ki para Nongsynshar ne ki paidbah nongshong shnong.
Ka Synjuk ki Nongsynshar Shnong ha ka jingïalang kaba la long kyrkieh ha ka 23 tarik mynta u bnai ha Office Hima Nongmynsaw Syiemship, ha kaba la wan ïa shim bynta lang da ki nongïalam shnong na ki shnong bapher bapher hapoh ka Hima, ha kaba la ïakren bniah halor kane ka kam.
La ïoh ruh jingpynshai na ki Sordar bapher bapher ba kam shym don kano kano ka jingbabe kumba la kdew ha katei ka khubor, ha kaba ki la kynthoh ruh ba ka jingpynmih ïa katei ka khubor, ka long tang ka jingpynbud nam sniew ïa ki shnong Garo kiba don ha ka thaiñ hapoh ka Langpih Sector.
Ka jingïalang ka pynpaw ba katei ka rukom kynthoh ka wanrah ka jingïasngew pher jaidbynriew (Communal) hapdeng u Khasi bad Garo, kaba kum ki paidbah ka thaiñ ngin ym lah ban pdiang satia da lei lei ruh em.
“Haduh mynta ki Nongshynshar Shnong hapdeng u Khasi bad Garo kumjuh ki paidbah Nongshong shnong ki don ïa kajuh ka sur bad ka jingïatylli tang kawei ka jingmut ban sah beit hapoh ka jylla Meghalaya ha kane ka jingthmu ïa pynbeit pud jong ki ar sorkar jylla”, ong ka kyrwoh na u Teiborlang Nonglang President bad Serbilin Lyngdoh Secretary, ha ryngkat u W.Marak u ba long u Chairman Joiñt Action Committee of all Garo Village Langpih Sector.