Shah kem u nongñiah Scooty uba tynrah ïa u khynnah skul ha Laitumkhrah

Shillong, Nailar, 24: Ki Pulit ka nongbah Shillong ha ka sngi Palei ki la register case bad kem noh ïa u nongñiah Scooty uba la tynrah ïa uwei u khynnah skul uba pule ha ka Class-XI ha St. Edmund’s Higher Seconcondary School, Shillong katba u mih na Anton Hall ban jam sha shiliang surok kaba don markhap bad ka Dos Bocso Technical School, Shillong.
U Superintendent of Police (City) ka East Khasi Hills District Bah Vivek Syiem ha u kyrwoh ba la phah sha ki lad pathai khubor u la ïathuh ba kane ka la jia ha ka por 10.55 baje mynstep ha kaba u nongñiah ïa ka Scooty (bym don registration plate) uba kit lang ïa u paralok u la tynrah ïa utei u khynnah skul hadien ba la ñiah stet bha ïa kane ka thuk thuk ar shaka.
Ïa u khynnah skul uba la mynsaw, la pynkit mar mar da ki paidbah sha Woodland Hospital da ka local taxi.
Ki Pulit kiba la wan poi ha kane ka jaka ki la bat noh ïa u nongñiah Scooty bad ïa uba shong lang bad phah leh medical check-up Woodland Hospital namarba kine ki arngut ruh ki la mynsaw.
U SP u la ïathuh ba ki doktor ki la bat noh ïa u khynnah skul hapoh Hospital ban ai jingsumar namarba ka kjat ka mon ka la paitdoh bad mynsaw ruh na ki bynta jong ka khlieh.
La pyntip ruh ba ki bahaïing hasem jong une u khynnah skul ki la pynkynriah noh ïa u sha GNRC Guwahati ha kaba mynta u la don ha ka jingtip briew.
U Superintendent of Police (Traffic) ka East Khasi Hills u K. Prasad ha ka sngi Palei u la pynmih ïa ka hukum ba la bthah ïa ki IC jong ki Traffic Branch, Shillong ba kin pynlong ïa ka jingpeitngor bad ka jingtalasi namar ka jingñiah khlemakor, ka jingñiah stet shaba palat jong ki nongñiah thuk thuk ar shaka bad kaba lam sha ka jingmynsaw jong ki briew. La bthah ruh ïa ki IC ba kin peitngor ha u pud treikam jong ki wat ïa ki kynnah ba dang rit ka rta kiba ñiah thuk thuk ar shaka bad ïa kiwei kiwei kiba pynkheiñ ïa ki kyndon jong ka Motor Vehicle Act.
“Ki dei ban bthah ïa ki Ophisar bad ïa ki Pulit kiba hap hapoh ka jingpeit jong ki ban bat/pynshitom lada lap ba don kino kino kiba ñiah thuk thuk ar shaka khlem akor,” la ong u SP (Traffic).
La bthah ruh ïa ki IC ba kin pynlong ïa ki jingai jingpynshai halor ki kyndon ñiah kali (Traffic Rules and Regulations), ki lad jingïada kiba ïadei bad ka jingñiah thuk thuk ha surok la ka long ïa ki nongñiah bad ïa ki nongïaid lynti bad ban kham shimkhia bha ïa ki khynnah skul/kolej ban kin tip shaphang ki jingshngaiñ haba ïaid ha surok.
Kane ka hukum kan treikam noh mardor.