Kumba 60 -70 persen ka vote na ri lum Jaintia kan leit sha u Dr. Nonglait – kob u Bah Sniawbhalang

Shillong, Jymmang 01 : U National Vice President ka National People’s Party (NPP) Bah Sniawbhalang Dhar ha ka sngi Nyngkong u la kob ba tang na rilum Jaintia, ka party ka don ka jingsngewskhem ba kin ïoh khur la kumno kumno 60 – 70 persen ka vote na bynta u kyrtong ka party u Dr. DRL Nonglait.
Ïa kane u Bah Sniawbhalang ba dei ruh u Symbud Myntri Rangbah ka Jylla, u la kren ha ka jingïalang ïalap elekshon MP kaba nyngkong eh na ka bynta u kyrtong ka party kaba long ha kane ka sngi ha Nongshillong kaba dei ka thain bad ka constituency jong u Dr. Nonglait.
“Tang ha rilum Jaintia ngi don haduh 19 ngut ki MDC kiba don ha ka Liang Synshar ha JHADC bad bun ngut ki MLA ka party, bad ngi la rai ruh ba tylli lang ngin kyrshan borbah ïa u kyrtong jongngi. Tikna beit 60 -70 persen ka vote kan dei na bynta u kyrtong jongngi,” ong u Bah Sniawbhalang.
Ha kajuh ka por u la ong ba kum ki nongialam ka party ki sngew tikna ba na ki constituency kiba hap ha West Khasi Hills kin tam beit ia ka 80 persen. “Ha Ri Bhoi ngi don sawngut ki MLA jong ka party bad la tikna ba ngin ïoh ïa ka 60-70 persen.”
U Bah Sniawbhalang u la ong ba ha East Khasi Hills kumba long mynta ki paidbah ki la sngewthuh lut baroh. “Ban jied ïa u nongmihkhmat phi hap ban pyrkhat bad dien bad khmat bad kadiang bad kamon namar ka jingkit kadei kaba khia.”
Une u nongïalam ka party u kyntu ruh ïa ki constituency jong ka Eastern West bad South West Khasi Hills ba kin trei borbah na ka bynta kane ka elekshon khnang ba u kyrtong ka party un poi sha ka thong.
Shuh shuh u la ong ba kum ki nongïalam ka party ki kmen haduh katta katta ban ïohi da ki hajar ki nongkyrshan kiba wan sha ka jingïalang kata ruh hapdeng u lapbah lapsan.
Kham hashwa kane, na ka liang u State President, Bah Prestone Tynsong u la ong ba lada nujor ïa baroh ki kyrtong kiba la dep ban pynbna kyrteng, u Dr. Nonglait udei uba la biang tam la ka long naduh ka kyrdan jingnang jingstad, ka jingshemphang bad ruh ha ka jingtieng burom ïa u Blei.
“Balei ngin pynlehnohei ïa kat une u briew uba la ïaid lut ïa ki jingeh ha ka jingim naduh dangrit haduh ba un da deng tie ha skulbah NEHU. Ki briew kiba sdang na iba rit bad kiew shajrong ki sngewthuh lut ïa ki jingeh. Kumta, nga khot nga wer ïaphi baroh na kane ka distrik, na West Khasi Hills bad South West Khasi Hills ban ai ka jingkyrshan kaba pura ïa une u riew rangbah,” u la ong.
U Bah Prestone u la ai khublei ïa i Kurim bad ki khun jong u Dr. Nonglait na ka bynta ka jingkyrshan jong ki ha kane ka lynti ïaid kum u kyrtong jong ka party.