Ha Delhi, mar ïajop ngan ïakhun ban ithuh noh ka Ktien Khasi ha Khyrnit ba Phra nalor ka ILP
Na ka constituency u kyrtong sdang ka NPP ban ïalap elekshon MP
Shillong, Jymmang 11 : U Kyrtong MP jong ka National People’s Party, u Dr. DRL Nonglait ha ka sngi Nyngkong u la ong ba lada ki paidbah ka Rilum Khasi – Jaintia ki pynjop ïa u ha kane ka elekshon MP shiteng samoi u buh hakhmat ban kren ha Delhi na ka bynta ban ai jingithuh noh ïa ka Ktien Khasi ha ka Khyrnit kaba Phra.
Haba kren ha ka jingïalang ïalap elekshon kaba nyngkong eh jong ka party na bynta ka elekshon MP shiteng samoi kaba sdang na Nongshilong, Eastern West Khasi Khasi Hills, u kyrtong u ong ruh ba nalor kane, un rah bad ïakhun ïa ka ishu jong ka Inner Line Permit kaba dei ka bynta kaba hakhmat eh ba ka Jylla ka thrang bad ka ïakhun la slem bha.
U kyrtong haba kren ha ka jingïalang kaba la poi da ki hajar ngut u la ïathuh ruh ïa ka jingïaid lynti jong u ha ka jingim kum u khynnah uba wan na ka iing kaba duk bha ha kaba u mad bun ki diengpyngkiang ban ïoh leit skul. Hynrei u ong pat ba hapdeng kine baroh da ka jingshaniah ha u Blei u la jop thiaw ïa ki jingeh bad poi sha ka kyrdan kumba u long mynta.
Nalorkata, u ïathuh ruh ïa ka jingtreikam ba watla um pat lah ban bat ïa ka shuki Nongmihkhmat hynrei u la trei borbah bha kum u samla rangbah na ka bynta ban kyntiew ïa ka thain ha ka roi ka pa da kaba trei ryngkat ryngkat bad ki bor sorkar ha ki phew snem ba la dep.
“Sngewtynnad ha kito ki por ba lada dei na ka bynta ka roi ka pa wat ki MLA kiba dei na kino kino ki party ki snohkti bad ai ka jingkyrshan lang ïanga,” u la ong.
U Dr. Nonglait u la ïathuh ba ha shwa ba un shim ïa ka rai ban ïakhun u la pan jingmut ym tang na ki bahaiing ha sem lane ki para ba ïatrei lang kiba la kham rangbah, hynrei u pan ruh ka jingmut na ki hajar hajar ngut ki khun samla kiba dei ki samla kiba u la hikai ne kynduh ha ka jingtreikam jong u.
“Baroh ki la ai mynsiem bad ka jingkitbok ba ngan jam shakhmat ha kane ka kam,” u la bynrap biang.
Ha kane ka sngi la ïoh ruh ïa ka jingkren na u Working President ka Party, Bah Hamlet Dohling, nangta na u President jong ka NPP Eastern West Khasi Hills, Bah Batskhem Ryntathiang, President Mawthadraishan Block, Kong Biolinda L Nonglait, President NPP West Khasi Hills Bah Gigur Myrthong bad President ka NPP South West Khasi Hills Dr. Kyntiew bad kiwei kiwei.