Hukum ka sorkar ban pynshisha ïa ki kot ki sla jong ki samla ba kwah pule doktor na bhah sorkar

Shillong, Nailar 24 : Ka sorkar jylla hynne ka sngi ka la hukum ban phah pynshisha ïa ki kot ki sla jong ki samla pule doktor haba ïadei bad kito kiban pule na ka bhah jong ka sorkar jylla.
Kane ka hukum ka la mih hadien ba ka KSU ka la kynnoh ba haduh 11 na ki 14 tylli ki bhah pule doktor na ka bhah jong ka sorkar jylla la ai sha ki samla pule ba dei na shabar Meghalaya ha ka thup Open Category.
Na ka liang ka KSU ka la dawa na ka sorkar jylla ba kan thad paidbah ïa ki kyrteng ba pura naduh Aadhar card bad ki EPIC jong kitei ki samla pule hadien ba ki la ïoh ïa ka jingujor ba ki dei na ka jylla Assam bad ki la ïoh ruh ïa ki kot ki sla na Ampati, South West Garo Hills.
Halor kane, haba kren bad ki lad pathai khubor, ka Myntri ka Koit ka Khiah, Kong Ampareen Lyngdoh ka la ong ba ïa katei ka phang la dep ban ïa kren bad u Myntri Rangbah ha katei ka janmiet. “La bthah ïa ki ophisar ba kin pynshisha ïa baroh ki kot ki sla jong kito kiba aplai na bynta ban pule doktor na ka bhah jong ka sorkar jylla bad ngin ym ailad da lei lei ruh ba kan jia,” ka la ong.
Shuh shuh ka la ong ruh ba lada lap kin sa weng noh ïa ka kyrteng jong kitei ki samla pule. Katkum ka jingïathuh jong ka, ka jylla ka ïoh haduh 93 tylli ki bhah pule doktor.