Jowai, Naiwieng 25: Ka lympung ïalehkai phutbol jong ka kyrdan ‘Super Division Football Tournament – 2024’ ïa kaba la tip kum ka “U Kiang Nangbah Memorial Trophy” bala pynïaid da ka West Jaiñtia District Sports Association, (WJDSA) kaba la long ha ka Lah Sngi U Blei (25 tarik Naiwieng, 2024) ha madan Kiang Nangbah Stadium, Dongmihsngi Jowai.
Haba phai sha ka jingïakhun kaba nyngkong, la sakhi ïa ka Ladthadlaboh kaba la pynjemkhnap haduh 12-0 kol ïa ka Shangpung Lumiawmushai.
U Rangdajied Sayoo (10, 31 & 58 minit) u la khyrwit da ka hat trik na bynta ka Ladthadlaboh ha kane ka jingïalehkai, bad lai ngut ki rangïalehkai ki la ïoh ban pynkhihjar mar ar sien, ba kynthup ïa u Banteilang Shylla (25 & 53 minit), u Buromlangki Salahe ( 42 & 86 minit) bad u u Samuel Phawa (76 & 77 minit), nangta u Sanki Langstang (21’), u Medonhi Salahe (49’), bad u Jervisly Rymbai (84’) ki la ïoh ban thep mar kawei.
Katba ha ka jingïakhun kaba bud la sakhi ïa ka Nangbah Mulang kaba la pynliem noh da 3-0 kol ïa ka 7 Wasa United. Ka namtam ha kane ka jingïalehkai ka long sha u Niponghi Sumer u ba la thep marwei ïa baroh lai kol ha ka 23, 26 bad 31 minit, ban pynthikna namjop na bynta ka kynhun.
La pyntip ka jingïakhun haka 27 tarik u Naiwieng, 2024 ka long hapdeng ka Mukhla Raij SC pyrshah ïa ka Shangpung Lumiawmushai ha ka por 11 baje mynstep. Katba ka 7 Wasa United kan ïakhun pyrshah ïa ka Demthring SC ha ka por 2 baje nohphai sngi.
