Shillong, Naiwieng 25: Ka Assam Rifles ka la pynlong ïa ka 4th Assam Rifles Half Marathon 2024 ha ka 24 tarik Naiwieng, 2024 (sngi U Blei) ha Laitkor, ka jaka ba katei ka kynhun shipai ka don ïa ka jaka treikam jong ka, ban kyntiew ïa ka Fit India Movement, ha kaba palat 1,900 ngut ki nongmareh ki la wan ïashimbynta.
Haba phaidien, ïa kane ka lympung ïakop mareh la pynlong nyngkong ha u snem 2021 bad naduh kane ka por ka la sdang ban pawnam ha kylleng ka ri. Mynta u snem la sakhi ïa ka jingwan mihkhmat ki 28 tylli ki Jylla bad 3 tylli ki Union Territory.
Ki nongiashim bynta ki kynthup ïa baroh shynrang bad kynthei hala ki jong ki kyrdan kaba pyni ïa ka mynsiem jinglong kawei ban kyntiew ïa ka jingïatylli jong ka Ri. Ka thei ïakura ba pawnam jong ka ri ka MC Mary Kom (Dkhot barim ka ïing dorbar Rajya Sabha) ka la long ka “brand ambassador”ha kane ka jingïakop mareh bad ka la ïashimbynta ha ka jingïamareh kaba 10 km.
Ha kane ka Half Marathon ka don haduh lai tylli ki kyrdan, kata na bynta ka 21 Km (Cloud Chase ), kaba 10 Km (Pine Path) bad kaba 5 Km (Crystal Stream). Baroh ki nongïashimbynta ka long palat 1900 ngut, ha kaba 347 ngut kiba mareh ïa ka 21Km Half Marathon, 826 ngut ha ka 10 Km bad 776 ha ka 5 Km.
Baroh ki nongïashimbynta ki la ïohopdiang ïa ki takma, ki sertiphiket kum ka jingithuh ïa ka jingtrei shitom jong ki bad ki T-Shirt ban sah jingkynmaw. La sam ruh ïa ki khusnam pisa kaba shongdor T.18.15 lak sha ki 48 ngut ki nongmareh ha ki kyrdan bapher bapher. Nalor kine, la sam ruh 150 tylli ki khusnam consolation. U Kailash Chaudhary na ka 20 Assam Rifles u la long u lahduh napdeng ki shynrang hadien ba u la lah pyndep mareh ïa ka 21 Km da kaba shimpor shi kynta tam (01 kynta: 05 minit: 30 sekon), katba ka Anjali Kumari na Bihar ka la long ka lahduh na ki kynthei hadien ba pyndep ha ka por 01:19:43 kynta.
Ha kane ka sngi la wan kongsan da u Air Marshal Surat Singh, AOC-inC Eastern Air Command u ba la sam ïa ki khusnam sha ki nongjop ha ka 21 Km bad 10 km. ïa kane ka jingïalang mynta u snem la kyntiew kum ka ‘Green Marathon’ kaba nyngkong eh ha ka thaiñ shatei lammihngi da kaba kyntu ban pynduh ka jingpyndonkam ïa ki plastik.
