SHILLONG, Naiwieng 25: Ka Umphyrnai bad ka Malki ki la khur pura ïa ki lai point hadien ba jop ïa ki jingïalehkai jong ki ha ka lympung First Division Football League 2024 jong ka Shillong Sports Association kaba la long ha SSA Stadium, Polo ha ka Lah Sngi U Blei.
Na ka liang jong ka Umphyrnai SC ka la lah ban pynliem noh da 5 – 2 kol ïa ka Nongrah SC, katba ka Malki SC ka la pynliem ïa ka Nongkseh SC da 2-1 kol.
Haba phai sha ka jingïalehkai kaba nyngkong u Isharwel Mukhim (61min & 63 min) bad u Primerose Lamat (67 min & 85 min) ki la ïoh ban thep mar 2 kol na bynta ka Umphyrnai, katba u Robertstar Malngiang (41 min) u la ïoh ban thep kawei.
Na ka liang jong ka Nongrah , ki ar kol ba ka la ïoh pynphai ki la wan lyngba u Denzil Warjri (29 min) bad na u Sonding Roy Rngaid (85 min).
Haba phai pat sha ka jingïakhun kaba ar, ka Malki ka la ïoh ban lamkhmat naduh ka minit kaba 14 lyngba ka kol na u Elisha Ryntathiang, bad ka kol kaba ar ka la wan lyngba u Banialam Nongrum (76 min) ha ka kylla miet.
Ka Nongkseh ka la ïoh ban pynphai shi kol na u Firstborn Khongsit (82 min) hynrei ka por ka la lyngkot eh ïa ka kynhun ban wanphai biang ha ka jingïakhun.
Ha kane ka sngi Hat Majai (26.11.2024) kin don ar tylli ki jingïalehkai ha ka 1st Division Football League 2024, ha ka por 11 shiteng mynstep ka Lawsohtun SC kan ïakhun pyrshah ïa ka Mawkhar SC, bad ha ka por 2 shiteng mynsngi ka Pohkseh SC kan ïakhun pyrshah ïa ka Mylliem SC.
