Jowai, Nailur, 13: Da ka jingkmen kaba khraw ka Jylla Niam Jowai ka khot ka wer ïa baroh ki paid U Blei sha ka jingpynkyntang Lyngdoh Sad ïa u Rev. Fr. Ferdinand Dkhar ha ka 1 tarik Risaw, 2023 ha Church of the Holy Spirit Parish Ummulong, West Jaiñtia Hills ha ka por 10:00 baje Mynstep.
U Archbishop jong ka Jyllañiambah Shillong u Most Rev. Victor Lyngdoh un long u kongsan ha ka riti lehniam pynkyntang Lyngdohsad ryngkat ka jingïasynran lang ki Bishop jong ka thaiñ Shathei Lammihngi.
La kha ïa u Rev. Fr. Ferdinand Dkhar ha ka 26 tarik Rymphang, 1962 ha ka shnong Ïongkaluh , East Jaiñtia Hills. U dei u khun Phrangsngi na ki 10 ngut ki khun jong u Ma Edwin Kyndait bad ka Kong Philomina Dkhar. La Pynkyntang Lyngdoh Sohblei ïa u ha ka 23 tarik Kyllalyngkot, 1994.
Na ka bynta ki kali kiba wan sha ka jingpynkyntang Lyngdoh Sad ha katei ka sngi, ïa ka jaka pynieng kali la pynbeit kumne: ïa kiba wan na East & West Khasi Hills bad Ri Bhoi District kin hap rung na Lad-Deinthare ban rung sha shnong Moodymmai. Kin sa don ki Volunteer ban pyni lynti.
Ïa kiba wan na ka Parish Amalarem bad ki thaiñ War-Jaiñtia, kin rung beit na Lad-Demthring ban poi sha Moodymmai. Kin sa don ki Volunteer ban pyni jaka parking.
Ïa kiba wan na Parish Namdong, Parish Mynsngat, Parish Ïongchwiat ba ki thaiñ Nongjngi kin rung na ki lad ka shnong Wahïajer ban pyni da ki Volunteer ha Wahiajer.
Ïa kiba wan na thaiñ Jowai, East & West Jaiñtia Hills, kin rung na lad CHC Ummulong. Kin sa don ki Volunteer hangta ruh.
Ïa kiba don Car-pass ki dei ban tah ïa ki sticker khamtan ki kali jong ki Phadar bad Sister bad la kyrpad ruh ïa baroh ki kali ba wan jingïaseng ban teh da ki lama lieh khnang ban pynsuk ïa ki Volunteer ban pynïaid ïa ki kali, la ong u kyrwoh ba la phah da u Media In-Charge Jowai Diocese u Fr. Ebormitre H Lamare.
