Ka ïewduh ka dei ban ïoh biang sa shisien ïa ka nam kum ka pliang ja jong u duk u suk

Shillong, Nailur 13 : U Chief Executive Member (CEM) ka KHADC, Bah Pynïaid Sing Syiem u la ong ba ka Council ka don ïa ka thong ba sa shisien ka Iewduh kan sa ïoh biang ïa ka nam kum ka iew kaba bna nam bad ka pliang ja na bynta baroh kiba rung ba mih ha kane ka iew kaba heh tam ha ka jylla.
Haba kren ïa kane ha ka jingpyllait paidbah ïa ka trok kit niut kaba la pynïoh lyngba ka skim Chief Minister Special Development Fund (CMSDF), u CEM u la ong, “Shisien ba ka jingshngaiñ ka la wanphai biang ha Iewduh, ki nongleit nongwan ruh ki la shngain bad kumta sa shisien pat ngin sa lah ban ïoh biang ïa ka nam kum ka pliang ja jong baroh ha kaba kino kino kiba rung ha iew kin ym mih thylli khlem da rah jingbam lane jingtah sha la iing ynda ki leit phai.”
Shwa kane, u CEM u la ïathuh ruh ba ha ka sngi Palei un sa kynduh ïa ka komiti ba kyrpang kaba peit ïa ka jingshngain ki nongshong iew bad ruh ïa ki nongïalam shnong jong ki shnong ba marjan ban ïakren shuh shuh kham bniah halor katei ka bynta.
U la pynbna ruh ba shen na ka liang ka Council kan sa phah pyndait da ki kor CCTV, nangta ki street light ha ki jaka ïaid bad ki basa nalor ban phah shna pynbha bad tei kham bun ki jaka leit bar na bynta ki nongshong iew.
Lah ruh ban kdew hangne ba katei ka jingaiti ïa katei ka trok kit ñiut kadei tang hadien ar taiew ba u CEM bad ka kynhun ki la lap ïa ka jingeh jong ka Hima Mylliem ban pynkhuid ia ki jaboh na ka daw ka jingduna ki kali kit niut bad ruh halor ka jingud ki paidbah ba la bun palat ki nongtuh wat mynsngi mynshai.
Hadien kane, na ka liang u Executive Member ka tnad Health and Sanitation, Bah Victor Rani u la ong ba ka KHADC kan sa peit ba ym shah shuh ban sah hapoh iew bad khamtam eh ban don noh da ki khyrdop khnang ba yn ym don shuh kiban ïoh rung ïoh mih laitlan shapoh iew hadien ba la khang ia ki dukan.
U Paiem Ainam Manik Syiem pat u la ong ba ka jingïoh ia ka kali thymmai ban pyndonkam da ki nongiew ban kit ia ki ñiut ki ñier ka la urlong namar ka jingtrei borbah jong u CEM ban pynïoh na ka skim jong u Myntri Rangbah na ka bynta ka khuid ka suba ha iew ha hat.