Ka India bad Bharat ki dei ki kyrteng ba la pruid dak ha ka Riti Synshar ka Ri : Conrad

Shillong, Nailur 13 : U Myntri Rangbah ka Jylla Conrad K Sangma , ula pynpaw ba u sngew sarong ban pyndonkam lang ïa ki kyrteng ‘ India’ bad ‘Bharat’ haba jer kyrteng ïa ka Ri namar ka dei kumba la pruid dak ha ka Riti Synshar ka Ri.
Haba pynpaw ba kam don satia kano kano ka jyrwit jyrwat ha kane ka kam, u Conrad ula ong “Lada nga kren ha ka Hindi, nga pyndonkam ïa ka kyntien Bharat, lada nga kren da ka phareng nga pyndonkam India. Ka Riti Synshar ka Ri ka la kren shai bha ba ka India ka dei ka Bharat. Kam don jyrwit jyrwat hynrei nga sngew ba ngi dei ma ngi kiba pynmih ïa ki jyrwit jyrwat haba ym don jyrwit jyrwat”.
“Peit kane ka ishu lada phi kylli ïa nga ha u 1947 lane 1950 ha ka por ba mih ka Riti Synshar ka Ri, ka rai ka long kaba kongsan. Ha katei ka por, ki nongthaw ïa ka Riti Synshar bad ki Nongthoh kot bad ki Nongïalam saiñ pyrthei ki la rai ba ka dei ban dei Bharat bad India bad kaei kaba ngi leh mynta ka long ba ngi bud ïa ka Riti Synshar ka Ri”.
U Myntri Rangbah ula ong ba ka shong ruh ha ki khep ki khep, ha kiba bun ki jingkren jong u haba u kren da ka Hindi, u ju pyndonkam beit ïa ka kyntien Bharat namar kane ka dei ka India bad ha kiba bun ruh ki rynsan, ula pyndonkam ïa ka kyntien India.
“Ngam sngew ba ka don ka jyrwit jyrwat, ka dei tang ha ka jingpyndonkam ïa ka ktien ka thylliej bad ngam sngew ba ka don ka jingbakla ha kaba pyndonkam ïa ka kyntien la ka dei ka India ne Bharat. Baroh ka shong ha ki khep ki khep ba phi don. Ka Riti Synshar ka aibor ïa ngi ban pyndonkam ïa ka kyntien India bad Bharat bad nga sngew sarong ïa baroh ar” ula ong.