Kawei ka Ri kawei ka Election dei ka buit ka BJP ban pyntroiñ ïa ki party barit : Pala

Shillong, Nailur 13 : U President ka Meghalaya Pradesh Congress Committee (MPCC) bad MP ka Lok Sabha Bah Vincent H Pala ula ong ba ka jingthmu jong ka BJP ban pynlong ïa ka Kawei ka Ri Kawei ka Election (One Nation, One Election) ka dei ka buit ban pyntroiñ bad pynduh pyndam noh ïa ki Party ki barit baria kiba don hapoh ka ri.
“Ka One Nation, One Election’ kam dei shuh kaba thymmai hynrei kadei ka jingthmu kaba la don naduh mynshwa, hynrei lada peit ïa ka jinglong jingman ha ka ri baroh kawei nga tharai kan eh bha, hynrei lada ka sorkar ka leh ïa kane kan long kumba ïuhroit ïa kito ki jylla ki ban long ïa ka elekshon ha kano kano ka por” ula ong.
U Bah Vincent ula ong “Kumba ka paw hi, ka BJP ka kwah ban pyntroin bad pynduh noh ïa ki party ki barit baria. Ha ka ri India baroh kawei, ki jylla ki don ïa la ki jong ki party kiba ïeng bad mihkhmat na ka bynta ki riewlum, ki jaidbynriew lajong bad ter ter hynrei ka BJP ka kwah ban pynduh noh ïa ki”.
“Ha ka jingsngewthuh ka jong nga, ka Congress kam hun ïa kane ka jingthmu. Ka la don ka por ba nga la dei uwei na ki dkhot jong kane ka Committee kaba ïakren ïa kane ka kam” ula ong.
U ïathuh ba ki don bun kiba kwah ban pynlong ïa ka ‘One Nation, One Election’ da kaba pynpaw ba kane kan pynduna ïa ki jingpynlut ha ka por elekshon hynrei u ong “ na ka party Congress ngi la pynpaw ba kam long kaba ïahap namar ba kan ïuhroit ïa ki hok jong ki briew”.
“Lada wan ka One India One Election, ka jingpynlong ïa ka elekshon kan long ïa baroh, hynrei ki hap ban pynkylla ïa ka aiñ bad kumno kin pynkylla ki la dep ban buh ïa ka Committee”.