Khlem ki bor shnong, ka eh palat ban ai ka jingshakri ba paka ha ka koit ka khiah : CM

Shillong, Nailur 13 : Ka sorkar Meghalaya ka la sdang mynta sa kawei pat ka sienjam na ka bynta ban pynbha shuh shuh ïa ka jingshakri ha ka koit ka khiah da kaba thaw ïa ki Village Health Council (VHC) ha ki shnong ki thaw kiba don ha ka jylla.
Haba kren kum u Kongsan ha ka jingpyllait paidbah ïa ka ‘Ayushman Bhava’ ha Meghalaya ha ka jingïalang kaba long ha State Convention Centre, u Myntri Rangbah u la ong ba ka jingkoit jingkhiah kam dei satia ka jingkitkhlieh tang jong ka sorkar jylla hynrei kadei ka jingkitkhlieh lang da baroh naduh ki longiing longsem bad shimet shimet.
“Ka jingkoit jingkhiah ka sdang da ka jinglehkhuid ha la iing, ha ki shnong ki thaw bad ha ka thain bad kumta ter ter ha ka imlang sahlang bad dei kane kaba pynlong ïa ki nongshong shnong ka jylla kiba koit ba khiah. Ka long ruh kaba donkam ïa ka jingtrei lang jong baroh ban pynurlong ïa kane,” u la ong.
Hashwa kane, u Myntri Rangbah u la ong ruh ba ka jingthaw bad pynmih ïa ki VHC kadei namar ki sngewthuh ba khlem ka jingtrei lang bad ki bor shnong kano kano ka prokram jong ka sorkar kin ym seisoh satia.
“Ngi la wan da ka VHC namar ka sorkar ka sngewthuh ba khlem ka jingtrei lang bad ki bor shnong kan ym lah satia ban ai ka jingshakri kaba paka ha ka koit ka khiah,” u la ong da kaba bynrap ba watla ki don bun bha ki jingeh haba ïadei bad katei ka bynta hynrei ka sorkar ka ïakhun tyngeh ban weng ïa ki.
Ha kane kajuh ka sngi, u Myntri Rangbah u la pyllait ruh ïa ka Village Health Council IEC Book, Register bad ruh ïa ka VHC App bad sam ruh ïa ki khusnam sha ki kynhun ba leh bha ha ka VHC/TB/ bad MHIS. La wan ban donlang ruh ha katei ka jingïalang naduh ki ASHA, ki nongtrei ka koit ka khiah bad ki dkhot ka VHC na kylleng ka jylla.
Katkum ka jingïathuh da u Director ka National Health Mission, Ram Kumar ki la don mynta haduh 6758 VHC bad mynta jan baroh ki 7000 tylli ki shnong ki la don.