Hap ban ïoh shwa ka jingshaniah na ki paidbah shwa ban hiar sha khappud ha u Risaw ong ki Ar CM

Shillong, Nailur, 13: U Myntri Rangbah ka Assam u Himanta Biswa Sarma bad u Myntri Rangbah ka Jylla Meghalaya u Conrad K. Sangma ha ka sngi Balang ki la ïakynduh markhmat ha nongbah Shillong ban ïakren halor ka jingïapynbeit pud bad rai ruh ban pynneh ïa ka shongsuk shongsaiñ shwa ban pynlong ïa ka jingjurip sha ki jaka ba ïakajia pud ha u bnai Risaw mynta u snem.
Ha ka jingïakren bad ki lad pathai khubor hadien ba la wai ka jingïalang, u Sarma u la ong, “ngi la shong jingïalang bad ngi la shim rai ban ngin ba ngin pynneh ïa ka shongsuk shongsaiñ bad lyngba kane, ngin sa leit sorjamin sha khappud khnang ba kane ka jingjurip kan ym pynmih ïa kano kano ka jingïakynad lada ma ngi baroh arngut ki Myntri Rangbah ki leit sorjamin bad hadien ba ngi la wanphai kan mih pat ka jingïakynad bad ki paidbah kin teipop kylla ïa ngi. Namarkata, ngi kwah ban pynneh shwa ïa ka shongsuk shongsaiñ.”
“Ynda la ïohi ïa ka shongsuk shongsaiñ, ngin sa leit sorjamin bad ngin sa ïasyllok ruh bad ki paidbah kiba sah ha khappud. Haba ngi leit sha Langpih, ki don bun ki tamasa. Namarkata, ngi kwah ban leit ruh sha Karbi Anglong bad sha West Jaiñtia Hills bad ban ïohi ïa kine kijuh ki tamasa,” ula bynrap.
U Myntri Rangbah ka Assam u la ong ba u kwah ban don shwa ka jingïakynduh bad ban sa leit jngoh ïa ka khappud ha u Risaw.
“Nga kwah ban leit ha u bnai Risaw. Lada u Myntri Rangbah ka Meghalaya u la lah ban wan sha Guwahati ha ka taiew banyngkong jong u Risaw, ngin sa lah ban leit la kumno kumno ha ka taiew baar jong u Risaw,” ula ong
Ha ka jingïapynbeit pud ha ka wat kaba ar, ki arngut ki Myntri Rangbah ka Assam bad Meghalaya ki la thaw ïa ki regional committee ban wad ïa ki lad ki lynti ki ban weng ïa ki jingeh ha ki hynriew tylli ki jaka ba ïakajia pud ka Meghalaya bad Assam.
Haba kylli, u Sarma ula ong, “ kumba ngi la ïathuh, kine ki hynriew tylli ki jaka ki dei kiba kham jwat namarkata ki regional committees ba la khlieh da ki briew la kham rangbah na baroh ar liang, ki la trei shitom ban leit jngoh ïa kito ki jaka manla ka por bad ngi ngeit ba baroh yn sa lah ban pynbeit da ka jingïasuk bad ka jingïasngewthuh jingmut.”
U Myntri Rangbah ka Assam u la kyntait ban jubab ha kaba ïadei bad ka jingdawa ban pynphai biang ïa ka Block I & II da kaba ong, “wat kylli ïa ki jingkylli kiba heh mynta namarba ka dang dei tang ka jingïakynduh jong ngi arngut.”
U Sarma u la kular ba ki ar tylli ki Sorkar Jylla kin sa leh katba lah ban weng ïa ki jingeh bad ki jingïakajia ha khappud ban pynhun lang ïa ki paidbah na ka jylla Assam bad Meghalaya.
Shwa kane, u Myntri Rangbah Conrad K Sangma u la ong ba kane ka jingïakynduh kaba mynta ka sngi ka dei tang ka lynti ban ïathir ïatai kumno ban ïarap ïa ki ar tylli ki jylla ban poi sha ka jingïasngewthuh jingmut.
“Kam don kano kano ka rai bad ngin sa nang ïai bteng ban ïakynduh na ka por sha ka por,” ula ong haba ai khublei ïa u Myntri Rangbah ka Assam, ïa u CEM ka KAAC bad ïa u Symbud Myntri Rangbah ka Jylla Meghalaya, uba khlieh ïa ka regional committee na ka bynta ka Jaiñtia Hills.