Shillong, Naiwieng 16: Ka Meghalaya Pro Boxing Council (MPBC), ka synjuk kaba la sei madan ïa u samla Shanborlang Marbaniang, rangïakura professional ba nyngkong ka jylla Meghalaya, hynnin ka Sngi Balang ka la pynpaw ba kum ka seng ka ju mad shibun ki jingeh ha kaba ïadei bad ka pisa.
Hynrei wat hapdeng kine ki jingeh ki ba ban ki dkhot nongkitkam jong kane ka synjuk kim shym la shongkli kti bad ïai bteng ban shakri ïa ka kam ban sei madan ïa ki rangkynsai kiba don ïa ka sap kaba kyrpang bad ban kyntiew ïa ki sha ki rynsan ïakura ‘Professional Boxing’.
Nalor jong u samla Shanborlang Marbaniang, ka MPBC ka la sei madan ruh ïa u samla ïarapborsing Kharbani bad u samla Elbin Rani kiba la leit ban mihkhmat dang shen ïa ka jylla Meghalaya ha ka Pro-Boxing kaba long ha Gujarat.
Haba ïakren sha ki lad pathai khubor na ka liang jong u Bah Kermiki Thangkhiew-Secretary MPBC u la pynpaw ba kum ka seng hi ka ju mad barabor ki jingeh ha kaba ïadei bad ka pisa hynrei watla kata ruh ka kynhun kam shym la kynrandien bad ïai shakri ban pynbit pynbiang ïa ki jingdonkam la ka dei ha ka jaka kilanmet ne ki khep ba ki rangïakura kin hap ban ïakhun shabar.
Shuh shuh, u la ai khublei ruh ïa katto katne ki synjuk kiba la snohktilang ban ai ka kti jingïarap ban nohsynñiang lem sha ka MPBC ban kyrshan ïa u Shanborlang ha ka jingleit shimbynta ka jong u sha ka rynsan ïakhun ‘Pro Boxing Fight Night’ ka ban sa long ha Arunachal.
Haba ïadei bad ka leit ka wan na ka liang jong u Bah Ïaidon Rumnong-Treasurer jong ka MPBC, u la ïathuh ba bun hi ka jinglut jingsep ka seng ka hap ban pynlut nalade hynrei na bynta ka jingïakhun ka ban long hapoh Arunachal ha ka 18 tarik la ïoh jingïarap khyndiat na ki Promotion kiba la khot sngewbha ïa u Shanborlang ban ïakhun ha katei ka sngi.
U la kyrpad ruh ïa kino kino kiba don ka mynsiem sngewlem ban ai jingkyrshan lem ïa ka synjuk khamtam eh na bynta ka jingïakhun ka ban long ha nongbah Delhi ha ka 25 tarik Naiwieng namar ka jinglut jingsep ka lah khambun.
Na ka liang jong ka kynhun ka la ju leit mih sha ki nongmihkhmat hynrei haduh mynta kam pat shym la don kano kano ka jingpynshai ba ki lah ban ai lad jingïarap bad kane ka lah ruh ban dei ba kane ka seng ka dang tymmai ïoh lehse ki bun ki bym pat tip la bynrap u Bah ïaidon Rumnong.
Kumban shu pynkynmaw, u samla Shanborlang Marbaniang hapoh ka lama jong ka MPBC un sa leit ban shimbynta biang sha ka rynsan ïakura kaba la tip da ka APB Fight Night ka ban long ha ha Mopin Solung Ground, Itanagar ha ka 18 tarik Naiwieng, 2023 bad aireng pyrshah ïa u Kumar Gurung u ba na Arunachal Pradesh ha ka kyrdan ïakhun Super-Fly Weight.Hadien kane, un sa bteng ban leit aireng sa sha Delhi pyrshah ïa u International Boxer napoh Nigeria, u Aliu Bamidele Lasisi u ba la khur namjop 17 sien, ha ka 25 tarik Naiwieng.
