Shillong, Naiwieng 16: Ki ar tylli ki jingïakhun jong ka lympung SSA 2nd DIVISION Football League 2023 ba la long ha 1st Ground SSA Stadium hynne ka Sngi ki la jam sha kaba kut ha kaba ka jingïalehkai kaba nyngkong ka la kut ha ka jingïakhaid katba ha ka jingïakhun kaba ar, ka Nongkrem SC ka la khur ïa ka namjop.
Ka jingïakhun kaba nyngkong ba la sdang ha ka por 11:30 baje mynstep, ka Sohryngkham SC bad ka Laitlyngkot SC ki la ïakhaid hadien ba ïa thep mar shi kol.
Dei ka Laitlyngkot SC kaba la ïoh ban thep ïa ka kol ba nyngkong hadien ka jingbakla thep hi u Shanker Kshiar rangïalehkai ka Sohryngkham SC ha ka 17 minit bad lamkhmat ïa ka jingïakhun ha ka kylla step.
Hadien ba la ïoh ban bteng biang ïa ka jingïakhun ha ka kylla kaba ar, na ka liang jong ka Sohryngkham SC ka la pyrshang ban wad ïa ki lad da kumno ban ïoh pynïphai bad hadien katto katne por u Shanker Kshiar u la ïoh ban khyllie biang ïa ka kol kaba la kum thep hi ha ka kylla step da kaba pynïakhaid ha ka 71minit. Haduh kaba kut ym shym la don shuh ba lah ban pynkhihjar kaba la pynlong ïa kine ki ar kynhun ban ïakhaid.
Haba phai pat sha ka jingïakhun ha ka kylla kaba ar kaba la sdang ha ka por 2:30 baje nohphaisngi, ka Jongksha SC ka la shah pynliem da 2-3 kol ha ka Nongkrem SC.
Haba bishar ïa ka jingïalehkai ka long shisha kaba itynnat naba ka jingïathep kol ka la wan mar-ïabud. Dei ka Jongksha SC kaba la thep nyngkong lyngba u Jorboklang khongsngi ha ka 45 minit hynrei ka Nongkrem SC ka la jubab da kaba pynphai lyngba ka kol u Iumeda Mawroh ha ka 60 minit.
Hadien katto katne por ka Jongksha SC ka la lamkhmat biang ïa ka jingïakhun lyngba u Babiang Umsong ha ka 69 minit hynrei sa shi sien pat ka Nongkrem SC ka la pynïakhaid lyngba u Shankupar Kharbyngar ha ka 85 minit bad thep ruh ïa ka kol pynjop na bynta ka kynhun ha ka 90+3 minit.
Ki jingïakhun mynta kan long biang hapoh 1st Ground SSA Stadium, kaba nyngkong kan sdang ha ka por 11:30 baje hapdeng ka Pohkseh SC pyrshah ïa ka Umphrup SC, bud sa ka jingïakhun kaba ar ha ka por 2:30 baje nohphaisngi hapdeng ka Laitkyrhong SC pyrshah ïa ka Lumshyiap SC.
