Wat sngewrem ne sngewpoh namar ba U Blei U ai ïa la ka bhah, ong u BDO ïa ki briew ba duna dkhot met

Mawkyrwat, Nohprah 05: Ka ophis jong u District Social Welfare Officer (DSWO), South West Khasi Hills District ryngkat ka jingïatreilang bad ka ophis jong ka District Legal Services Authority, Mawkyrwat mynta ka sngi ki la pynlong ïa ka jingrakhe ïa ka sngi jong ki briew kiba duna dkhot met ha Hall jong ka Maharam Higher Secondary School, Mawkyrwat ha kaba u bah I. Lawrynniang, MCS, Block Development Officer C&RD Mawkyrwat u la long u kongsan.
U bah I. Lawrynñiang, MCS, Block Development Officer (BDO) jong ka C&RD Mawkyrwat Block haba kren kum u kongsan u la ong ba ïa kane ka sngi la ju rakhe ha kylleng ka pyrthei ha kaba ïadei bad ki briew kiba don ka jingduna ha ki dkhot met bad ha kajuh ka por u pynpaw ïa ka jingkmen ban ïa don ryngkat bad ki ha kum kane ka sngi kaba kyrpang. Ha kajuh ka por u la pynkynmaw ba kum ki briew kim biang ha baroh ki liang, ki biang ha wei bad ki duna hawei namarkata, wat lada ki don hapdeng ki jingduna kim dei ban don ka jingsngewrem ne sngewpoh namar ba U Blei U la ai ha ki ïa la ka bhah ryngkat ki sap ki phong kiba kyrpang kiba ki dei ban pyndonkam na ka bynta ka jingmyntoi jong ki hi.
Shuh shuh u la ong ba ki don shibun ki ‘riew khraw ha ka pyrthei kiba hapdeng ki jingduna ha ki dkhot met, pynban ki paw hakhmat ka pyrthei da kaba pyndonkam hok ïa ki sap ki phong kiba U Blei U la mang kyrpang na ka bynta jong ki. Namarkata, u pynshlur bad ai mynsiem ïa ki ban ym pynsngew ïa ki jingduna hynrei ban ïaid shakhmat bad ban shim ïa ki lad ki lynti kiba ka sorkar ka ai lyngba ki skhim bad kiwei kiwei ki jingïarap ba la mang kyrpang na ka bynta ban ïoh ïa ka jingim kaba pura ka ban ïa ryngkat bad kiwei pat ki para briew bad ban poi sha ka thong kaba ka phang ka long ban ïatreilang na ka bynta ban wanrah ïa ka jingkylla nangne shakhmat.
Ha kajuh ka por u la khot la wer ïa ki ban weng noh ïa baroh ki jingsngew briew hynrei ban rai bad kut jingmut ban kiew shakhmat ban ïa kito kiba biang pura bad ban long ki khlur bad nongmuna ïa ka ri bad jaidbynriew baroh kawei.
Ka kong Nosmi Hashah, Advocate, Chief Legal Aid Defence Counsel ha ka jingkren jong ka ka la batai kham bniah halor ka ‘Rights of People with Disabilities Act 2016’ bad ban pynthikna ba ki PWDs ki dei ban ïoh ïa ka hok kaba mar ïa ryngkat bad kiwei bad ban peit ba kim dei ban shah ñiew shiliang khmat ne duh noh ïa ka hok kaba ki dei ban ïoh bad ban ai ki jingïarap bad jingïada ïa kito kiba donkam ka jingïarap ha ki jingïatyngkhuh bad ka aiñ khnang ba kin ym shah iehnoh beiñ bad ban ïada ïa ki na ka jingshah ïuhroit bad thombor.
Ha kajuh ka por ka la wer bad khot ïa kito kiba donkam ka jingïarap bad ïatakhuh bad ka aiñ ba kin wan sha ka ophis jong ki da kaba pynsngew ba ka ophis jong ki ka kloi ban ïarap bad ai jingmut halor kita ki bynta.
Ha kane ka sngi u bah R.J. Wahlang, In-charge UDID, u la ai ka jingpynshai halor u UDID (Unique Disability Identification) kumno ban aplai bad halor ki skhim ne ki lad jingïarap kiba kito kiba don ïa utei u UDID ki lah ban aplai bad don hok ban ïoh.
La ïoh ruh ïa ka jingrwai bad jingshad kyrpang na ki briew ba don ki jingduna ha ki dkhot met bad ka jingsam ïa ki jingaisngewbha sha baroh kiba la ïa wan ha katei ka sngi.
U bah E. Tariang, District Social Welfare Officer, South West Khasi Hills District u la ai ka jingkren lamphrang halor ka jingrakhe ïa kane ka sngi, u bah S. Lyngdoh, MRW, Mawkyrwat C&RD Block, South West Khasi Hills District u la ai ïa ka jingkren pdiang sngewbha katba ka kong B. Wanniang, Supervisor, jong ka ophis District Social Welfare Office, South West Khasi Hills District, Mawkyrwat ka la ai ïa ki kyntien khublei.