Nongstoiñ, Nohprah 5: Kum ka jingpynthymmai biang ïa ki mat ba donkam kiba ka sorkar ka la bynshet ha ki bor pynïaid district hapoh ka jylla, ba kin pyntreikam ïa kiba bun ki mat na ka bynta ban ïada ïa ki paitbah, lada ki bor ka mariang kin wan lynshop ha kano kano ka por, ka ophis u Deputy Commissioner West Khasi Hills lyngba ka District Disaster Management Authority, ka la sdang ïa ka jingai jinghikai kaba lai sngi na ka bynta ki nongtrei ha ki tnad treikam sorkar khamtam eh ïa ki nongtrei ha art ylli ki Block Office jong ka West Khasi Hills.
Ïa katei ka jingai jinghikai la pynlong ha TRYSEM Hall ha ophis u Deputy Commissioner, ha kaba la pynïaid da u bah Jonathan Mawthoh District Disaster Management Officer, katba u bah Phyrnai Marbañiang Director ba la shong thait jong ka Department of Information & Public Relation u la long u resources person.
Ha kane ka prokram, la ïoh ruh ïa ka jingpynshai lyngkot na u bah H.K.Thabah Additional Deputy Commissioner, u ba la ong ba ha ar tylli ki Block ha West Khasi Hills ki la don la ki jong ki Disaster Management branch. Hynrei kane ka jingai jinghikai kaba la sdang ha kane ka sngi ka dei kum ka jingpynthymmai biang bad namar ba ki don ruh ki mat kiba ka sorkar ka dang pynrung thymmai.
Nalor kata u la ong ruh ba ka jingai jinghikai, ka dei ruh namar ba ki don ki nongtrei ha ki ophis sorkar kiba la shong thait noh na ka kam, ki don ruh kiba la khlad bad kiba la shah pynkynriah kam sha kiwei pat ki district. Dei halor kane ka nongrim ba ka DDMA ka hap ban pynthymmai biang bad ban ai jinghikai kumno ban ïarap ïa ki paitbah ha ki por ba ki shah lynshop ha ki bor ka mariang.
Nalor kata u la ong ruh ba ka long kaba donkam ba ki dorbar shnong ruh ki dei ban shimkhia halor kane ka mat, da kaba ïatreilang bad ka DDMA, khnang ban pynsngewthuh ïa ki paitbah ba haba ki bor ka mariang kin wan lynshop, kim dei ban ap tang na ka DDMA lane tang na ki bor sorkar, hynrei ba ki nongshong shnong ruh kin nang kumno ban ïarap haba don ki jingjia ki ba kyrkieh.
U bah Phyrnai Marbañiang u la batai bniah ha kaba ïadei bad ka jingpynlong aiñ jong ka sorkar ïa ki mat kiba ïadei bad ki jingshah ktah lada jia ki jinglynshop jong kii bor ka mariang.
U bah Marbañiang u la ong ba ka jingpynlong aiñ jong ka sorkar ïa katei ka Management, ka dei hadien ba ki la don ki nongmihkhmat na ki jylla jong ka ri India, kiba la rah ïa katei ka mat sha ka dorbar Parliament ha Lok Sabha bad hadien ba ka ïingdorbar ka la ïatai sani ïa katei ka mat, la mynjur bad pynlong aiñ ïa ka bad mynta baroh ki jylla ha ri India ki la hap ban pyntreikam ïa katei ka aiñ ha man kawei pa kawei ka district.
U la pynshai ruh ba kum ki paitbah nonghong shnong, ki hap ban don ka jingpynïadei kaba jan bad ki para nongshong shnong. Namar lada jia kino kino ki jingwan lynshop kynsan jong ki bor ka mariang, ki hap ban ïasnoh kti lem bad ban ïadon bynta lang ha ka ban pyllait ïa kiba mynsaw bad kiba shitom.
Ha kane ka sngi la wan ban ïashim bynta da ki nongtrei jong ki ar tylli ki Block Office ka Mawshynrut bad ka Nongstoiñ. Nangta ruh la wan ban ïashimbynta lang da ki ophisar jong ka tnad Meghalaya Home Guard jong ka West Khasi Hills.
