Mawkyrwat, Nohprah 05: Kawei ka jingjia kaba la jia mynta ka sngi ka 5 tarik u Nohprah, 2023 ha ïew Mawkyrwat ha kaba la lap ïa kawei ka met ïap jong uwei u rangbah uba la thiah ha madan.
Ha ka tyllong khubor na ki pulit la ong ba katkum ka jingpyntip jong ki kaba ha ki por kumba 1:30 nohphai sngi ba ka la don kawei ka met ïap ha ïew Mawkyrwat ka dei kaba dei jong uwei u rangbah briew. Kumta na ka liang ki bor pulit hapoh ka jinglam khmat jong u I. Thabah, Sub Inspector jong ka Mawkyrwat Police Station la ong ba ha ka jingtohkit la lap bad pynshisha ba ka met ïap ka dei ba la tip kum u (L) Tyngshainlang L. Marshillong, 30 snem na ka shnong Pyndenspar, Jakrem.
Hadien ba kata ïa ka met jong u la rah noh mar mar hapoh Civil Hospital Mawkyrwat ban pyndep ïa ka Postmortem bad ïa ka met ba sah la aiti noh ha kiba ha ïing ha sem ba kin pyndep ïa kaba donkam.
Katkum ka jingïoh jingtip na ka kmie jong u (L) Tyngshainlang L. Marshillong la ong ba une uba la khlad u dei uba ju mlien ha ka bam ka dih bad u khlem la katto katne sngi kata naduh ka 2 tarik u Nohprah, 2023. U la jah ruh na ïing naduh ka 4 tarik u Nohprah, 2023 janmiet bad la ïohi khadduh ïa u ha ka por 11 baje mynstep ha ïew Mawkyrwat ha ka jingbuaid, ong ka tyllong khubor na ki pulit.
