Nongstoiñ, Risaw 22: Ki riew sniew riew smeh ki bym pat tip ki dei kiei, ki la pynjot pynpra ïa ka jaka ïeng kai ban jngoh ïa ka jingitynnad jong ka kshaid Weinia kaba don ha Dewlynnong Nongkhnum.
Katkum ki tyllong khubor la ïathuh ba kane ka jingjia ka la jia ha ka miet jong ka 16 tarik u Risaw 2026.Namar la lap ne bna pat sa ha ka step jong ka 17 tarik u Risaw 2026 kaba hap ha ka sngi saitjaiñ jong ka taïew.
Haba ïadei bad katei ka jingjia na ka liang u nongthoh khubor haba pyrshang ban kylli pyrthew na ki katto katne ngut ki briew kiba shong dukan ha katei ka jaka, ban wad jingtip mano ba donkti ha katei ka kam. Hynrei bun napdeng jong ki, kim bna ei ei halor kane.
Hynrei la ïoh jingtip pat ba ka Kur bah jong ka Ïawren bad Ïawlar, ki la dep ban ïashong pyrkhat bad ka Kurbah ka la rah noh ïa katei ka phang ban ïakren sani bad ka shnong ruh, ban ïathir jingmutlang kumno ban lap ne ban leh ïa kiba donkti ha katei ka kam leh dusmon.
Ka la don ruh ka jingsuba ïa ki katto katne ngut ki briew kiba donkti ha katei ka kam jah burom, hynrei ka jingtohkit na ka shnong ryngkat ka Kurbah ka dang ïaid shakhmat.
Halor kane ka jingjia kaba la jia, ka la long shisha kaei kaei kaba I jah burom ïa ka dong ka thaiñ West Khasi Hills bad ïa ka jylla hi baroh kawei, namar ka jingbym pat sngewthuh ki briew ïa ka jingmut bad ka jingitynnad ka mei mariang.
Ki don bun ki bynta kiba la shna kyrpang lyngba ka tnad Tourism kiba don hajan ka kshaid Weinia, kaba dei kawei na ki Kshaid kaba itynnad bha bad kaba la paw bha ha ka jylla Meghalaya bad wat shabar ri ruh. Hynrei, mynta ka kynti la ïohi ba ki la shah pynpra dusmon ha ki briew ki bym pat la tip mano ba leh ne donkti.
