Nongpoh, Nohprah 05: Kumba shityllup ka pyrthei ki ju rakhe ïaka sngi kyrpang jong ki briew kiba don ki jingduna haki dkhot met bala tip kum ka International Day of Person with Disabilities ka ophis u Block Mission Co-Ordinator, SSA-SEMAM Umling BRC ryngkat ka jingïatreilang bad ka Hans Foundation mynta ka sngi kala rakhe kyrpang bad ki briew kiba duna dkhot met bala pynlong ha ïing Dorbar Nongpoh.
Ha katei ka jingrakhe kyrpang ïaka sngi kiba duna haki dkhot met la wan ban shim bynta da u Bah Mayral Born Syiem MLA ka Nongpoh kum u kongsan haka jingdonlang u Raja Brahma ADC ka Ri-Bhoi kum u symbud kongsan, ka Jurimita Puzari Project Manager ka Hans Foundation, Lalchandami Marak JRDO ka Umling C&RD Block, PP Yadav BMC ka Umling BRC bad kiwei kiwei ki riew rangbah, ki kmie ki kpa lem bad ki khun jong ki kiba don jingduna haki dkhotmet.
Ha katei ka sngi la pynlong ruh ki jingïalehkai bapher bapher bala shim bynta da ki khynnah ba don jingduna haki dkhot met bad kumjuh ruh la pynlong ïaka jingsumar ei (Medical Check Up) ïa baroh ki khynnah bala peit bad khmih da ka Hans Foundation.
Haba kren ha katei ka sngi naka liang u Bah Mayral Born Syiem MLA ka Nongpoh kum u kongsan u la ai ka jingïaroh ïaka ophis u BMC SSA-SEMAM ka Umling BRC bala pynlong bad kynmaw burom ïa katei ka sngi bad khamtam ban kynmaw kyrpang ïaki briew kiba don jingduna haki dkhotmet, namar ki ruh ki don ka bynta bad ka hok ban im lem kumba long kiwei haka imlang ka sahlang.
U la ong ruh ba kum u MLA u sngewmyllung ban iohi ba ki khynnah wat hapdeng ka jingduna ki don ka sap ka phong kaba kyrpang kaba u Blei nongbuh nongthaw u la ai haki, bad kyntu ruh ba kum ka imlang ka sahlang kim dei ban ñiew beiñ lane ibeiñ ïaki hynrei ki ruh ki don ka hok ban im lem kumba long kiwei.
U la ong ruh ba kum u MLA um shym la shongthaid ban peit kyrpang ïa ki briew ba duna haki dkhot met naduh ki skhim sorkar bad naka liang jong u, u dang ïaleh ruh katba lah ban wanrah ki jaka pule ba kyrpang naka bynta kitei ki briew ba kyrpang namar ka long kaba eh ban shong bad pule lang bad kiwei ki biang namar ki donkam ka jinghikai bad ka jingpynleit jingmut kaba kyrpang.
