Shillong, K’Lyngkot 11 : Da kaba ïaroh ïa ka Executive Committee jong ka KHADC kaba la shimkhia ban khynra Trading Licence ha kylleng ki jaka, ka KHNAM ha ka sngi Palei ka la kyntu ïa u CEM, Bah Pynïaid Sing Syiem ba um dei shuh ban ai Trading Licence thymmai ha Ïewduh bad kumjuh ha nongbah Shillong baroh kawei.
“Ngi la kyntu ïa u CEM ban ym trading licence shuh sha ki bar jylla kum ha Ïewduh bad ha Sor Shillong baroh kawei, nangta ha Umsning, Khanapara bad Nongpoh ha Ri Bhoi District bad ruh ha kiwei kiwei ki jaka,” ong u General Secretary ka KHNAM, Bah James Nongneng haba kren bad ki lad pathai khubor hadien ka jingkynduh bad u CEM.
Katkum ka jingong jong u, ka aiñ Section 10 (2) (vi) jong ka United Khasi Jaintia Hills District (Trading by Non-Tribals) Regulation, 1954 ka khanglad ban ai Trading License ïa ki bar jylla ban leh ïa ki kam khaii pateng ha u pud u sam jong ka Council lada jia ba ki trai muluk trai jaka ki la lah ban trei hi.
Haba pynshai bniah halor katei ka phang, u Bah James u la ong, “Ka jingdawa jongngi ban ym ai trading license shuh ïa ki bar jylla kadei namar ki la don bun bha ki samla trai muluk trai jaka kiba la tbit bad nang ban trei ïa ki kam khaii pateng khamtam ha kum kane ka juk kyrduh kam kyrduh jam.”
U ong ruh ba ha ka jingïakren na ka liang u CEM u la kular ban shimkhia bha ïa kane ka bynta nalor ba ka EC ka la dep ban ïaid shakhmat ban khynra trading license kylleng ki jaka kiba hap ha ka jingkhmih jong ka Council.
“Tangba ka jingkwah jongngi ka long ba nalor ba pynjur ïa ka jingkhynra donkam ruh ban pynduh pyndam syndon noh ïa ka jingai trading license sha ki bar jylla,” u la bynrap biang.
Kumta u la ïai ban biang da kaba ong ba dei tang da kaba pynmih bad pyntreikam ïa ka section 10 (2) (vi) jong ka United Khasi Jaintia Hills District (Trading by Non-Tribals) Regulation, 1954 ba katei ka kam kan seisoh bad urlong.
