Nongpoh, Rymphang 22: Ki paidbah na ka shnong Umtangar bad kiwei kiwei ki shnong ba marjan naduh ki riew rangbah, ki longkmie bad ki samla, ryngkat ki khynnah skul na ki skul bapher bapher da ka jingsngewsih mynta ka sngi kila mih shakhmat ban pynlong da ka jingïaid paidbah naduh Umlur sha Umtangar ban pynrem jur ïa ka jingshah pynïap dusmon jong u heprit Kitborlang Marbaniang ha ki riew thrang snam hadien bala lap ïa ka met jong u ha ka janmiet jong ka 18 tarik mynta u bnai na kawei ka kper kaba don harud kane ka shnong.
Kum ban shu pynpaw hangne ba u heprit Kitborlang Marbaniang ba dei u khun ba 4 jong u Bah Synshar Nonghyndah bad ka Diona Marbaniang u la mih nala iing ha ka 17 tarik mynta u bnai, ban leit pynshngaiñ bad la ki paralok khynnah rit ban ap ïa u synsar ha kawei ka sem kaba jngai tang kumba katto katne na ka jaka ing ka jong u hynrei u khlem wanphai iing shuh tad haduh bala lap syndon ïa ka metïap jong u ha ka janmiet jong ka 18 tarik kaba dei ka sngi U Blei na kawei ka kper ki para marjan ryngkat ki dak mong ha ka durkhmat.
Ha kane ka jingïaid paidbah kila mih ruh shibun ki sur pynrem ïa katei ka jingshah pynïap dusmon jong u heprit Kitborlang lyngba ki placard bala rah da ki paidbah bad khynnah skul kiba la dawa ruh ïa ki bor ka aiñ ba ki dei ban shimkhia ban tih bñiah ban pynlong ka jingtohkit bad ban kem mardor ïa ki riew thrang snam ryngkat ki jingthoh bad byrngem “Wat ai jamin ïa u nongpynïap” “Lada ki briew jong ka aiñ kim lah ban ioh kem ïa ki briew beaiñ ngin shim hi ïa ka aiñ ha kti” namar ka jingbitar.
Hadien ka jingïaid paidbah la pynlong ruh ka jingïalang lyngkot ha ka shnong Umtangar ha ka jingdonlang naduh ki nongïalam ka Western Ri-Bhoi Dorbar, nongïalam ka Hima Jirang, ki nongïalam seng bhalang bapher bapher, ki nongïalam shnong bad kiwei kiwei ki riew rangbah.
Haba ai jingkren ha katei ka sngi na ka liang ki nongïalam shnong, sengbhalang na ka thaiñ Western Ri-Bhoi mynta ka sngi kila pynrem jur ïa katei ka jingjia ryngkat ka jingdawa ba ki bor jong ka aiñ ki dei ban shimkhia ban kem mardor ïa ki runar ba donkti ha katei ka kam pyniap briew bad shim ïa ka jingim ba lui lui jong u heprit ryngkat ka jingpynsajia kaba tyngeh.
Ki la ong ruh ka daw aiu ba utei u heprit u la leh tad haduh ban da shim syndon ïa ka jingim na kane ka sla pyrthei ha ka rta kaba dang 10 snem bad ki la pynpaw ruh ba kine ki kam pynïap kam dei shuh ka jingjia kaba nyngkong hynrei ka la don ruh ka jingshah pynïap jong ki riew rangbah, ki kynthei bad kumjuh ki khynnah ha katei ka shnong, hynrei ki khlem paw pyrthei satia kaba la wanrah ka jingsyier bad ka jingtieng jingsmiej khamtam ïa ki kynthei khynnah.
Katto katne na ka liang ki longkmie kila pynpaw ka jingsngewkmen kaba khraw ba watla kane kam dei ruh ka sien ba nyngkong ba jia ki kam pynïap ha katei ka shnong hynrei ka dei ka sien kaba nyngkong ki paidbah naduh ki longkmie, ki rangbah ki nongïalam shnong ryngkat ki khynnah skul ki mih paidbah ban pynrem ïa kum katei ka jingjia kaba pynpar ñiangkhriat ïa kiba bun ba lang ym tang ha katei ka shnong hynrei wat sha kiwei kiwei ki jaka ha kaba la kyrpad ruh ïa ki bor ka aiñ ba dei ban shimkhia ïa katei ka kam ban kem ïa ki runar ba donkti khnang ba kum kitei ki kam kin nym jia shuh nangne shakhmat.
