Kyntu u Dr. Celestine ïa ka Sorkar ban ïakren bad ka RIMS na bynta ki doktor Meghalaya

Shillong, Rymphang 22 :U MLA ka Congress na Umsning, Dr. Celestine Lyngdoh ha ka sngi Palei u la kyntu ïa ka sorkar jylla ba kan kyrpad ïa ka Regional Institute of Medical Sciences, Imphal ba kan mang katto katne ki tnad kum ka Radiology na bynta ki jingpule pyntbit ïa ki doktor na Meghalaya.
Kane ka jingkyntu jong u, kadei hadien ba ka Myntri ka tnad ka Koit ka Khiah ka jylla, Dr. Ampareen Lyngdoh ka la pyntip ba ka Bhaitbari CHC kam pat biang satia ki tiar treikam na ka daw ba ym don ki doktor kiba la pyntbit ban pyndonkam bad peit ïa ki tiar sumar.
Halor kane, u Dr. Celestine u la ong ruh ba bun tylli ki jylla ha ka thaiñ shatei lam-mihngi jong ka Ri ki pyndonkam ïa ka RIMS, Imphal na ka bynta ki jingpule pyntbit. Hynrei u ong pat ba bunsien katei ka jaka pule doktor ka ju mang ïa ki tnad kiba ki doktor ka Meghalaya kim donkam.
“Kumta, ka tnad ka Koit ka Khiah ka lah ban kyrpad ïa u Director ka RIMS, Imphal ban mang katto katne ki tnad ha kaba ngi donkam ïa ki specialist kham kyrkieh kum ha ka Radiology khnang ba ngin lah ban phah ïa ki doktor kiba don ha ka kam ban pyntbit ïalade,” u la ong.
Na ka liang ka Myntri haba jubab halor kane, ka la kular ba kan bishar bniah ïa ka jingai jingmut jong utei u nongmihkhmat.
Ha kajuh ka por ka Myntri ka la ong ruh ba ka sorkar ka buh thong ban don ïa ki X-ray bad USG na bynta ka Bhaitbari CHC ha shwa ban kut jong u snem 2024. Ka pyntp ruh ba ki doktor mynta ki dang shah pyntbit da ka jingïarap jong ka sorkar Tamil Nadu ban leh ïa ka ultrasound sonography.