Shillong, Rymphang, 22: Ka Garo Hills Autonomous District Council (GHADC) bad ka Jaiñtia Hills Autonomous District Council (JHADC) ki la shah ktah bha haduh katta katta na ka daw ka jingkhang ban tih dewiong thliewkhnai ha Meghalaya, la ong u Myntri Rangbah ha ka sngi Palei.
“Namar ka jingkhang tih dewiong dang shen ka la ktah bha i aki bad mynta ngi dang ap ban pynsdang noh ïa ka jingtih dewiong katkum ki kor ki bor ka juk stad saïan, dei namarkata, ka jingmih ka duna bha. Ka jingbym ïohlum khajna ka la hiar arsut namar ki daw bapher bapher kiba ngi mad na ki kyndon tih deiwong bad kiba shah ktah bha mynta ki dei ki Council, kane ka dei ka jingeh kaba ki mad bha mynta,” ong u Sangma ha ka jingïakren bad ki lad pathai khubor.
Haba kylli hato ka Sorkar kan lah neem ban weng ïa ka jinghiran pisa jong kine ki ar tylli ki ADC, namarba kim pat lah ban siew ïa ka tulop da ki snem, u Sangma u la ong ba ka Sorkar ka don ban ïarap bad ban ai jingkyrshan ïa ki district councils hynrei kam lah ban shim lut ha lade ïa ka jingkitkhlieh ban siew ïa ka tulop.
“Ngi long kiba kloi ban ïarap bad ban ai jingkyrshan hynrei ngim lah ban shim lut ïa ka jingkitkhlieh ban ai sa ka tulop. Ngi la pyrshang ban wad ïa ki lad ki lynti ban ai jingkyrshan ïa ki, ïa kane ka kam ngi dang bishar bniah. Ngin sa peit kaei kaba ngi lah ban leh,” la ong u Sangma.
“Hynrei ka jingkitkhlieh ka dei beit jong ki Autonomous District Council ban pynïaid ïa ka pisa pilaiñ,” u la bynrap.
U la ong ruh ba ka GHADC bad ka JHADC mynta ki mad ïa ka jinghiran pisa ban ïa ka KHADC bad mynta ki la hap kiar na kaba thung nongtrei thymmai. Ka GHADC ka la pyrshang ban pynduna ïa ki nongtrei na ka 2100 ne 2300 sha ka 1500 ngut.
Ka Non Gazetted Employees’ Association (NGEA) jong ka Garo Hills Autonomous District Council ka la aipor khatduh 7 sngi ban pyllait ïa ka tulop kaba dang sahteng haduh 32 bnai jong ki nongtrei.
