Wan sakhi u Myntri Rangbah ka jylla ïa ka National Boxing C’ship
Jam ki khlur ïakura sha ka semi final.
Shillong, Naiwieng 29: Ka rynsan ïakura 7th Elite Men’s National Boxing Championship ba la pynlong ha SAI Indoor Hall, Shillong, ka la ïoh ban pyndep ïa ka wat jingïakhun quarterfinal hynne ka Sngi Balang, bad la ïoh ban sakhi ïa ki khlur ïakura ba pawkhmat jong ka Ri kiba la jam shaduh ka Semi final.
Ha kane ka sngi, u Myntri Rangbah ka jylla, u Conrad K Sangma u la wan ban sakhi hi dalade ïa katto katne ki jingïakhun u ba la kitbok kitrwiang ruh ïa kitei ki khlur ïakura ba kynsai jong ka Ri ha kane ka C’ship katba kane ka lympung ka dang ïaid shakhmat.
“Ka long ka jingkmen bad ka burom kaba khraw ban ïoh pynlong ïa kane ka championship ha Shillong. Na ka liang jong ka sorkar ruh ka la ïaleh katba lah ban kyntiew shaphrang ïa ka kam ïalehkai hapoh ka jylla da kaba ai jingkyrshan ïa ki sports association, da kaba pynbit pynbiang ruh ïa ki shlem bad ki jaka kilanmet bad ruh ki rynsan pynlong lympung kiba kum kane,” la ong u Conrad Sangma. “Ki jingeh ki don namar ka dei ka kam kaba ngi dang shu sdang. Ngin sa nang trei shitom ban kyntiew katba dang ïaid ki snem bad kyrmen ba ngin sa ïoh ruh ban pynlong wat ïa ki International Event.
Haba phai sha ki jingïakhun, ki la don kumba 104 ngut ki rangïakura kiba naki 13 kyrdan ïakhun ki la pyndep ïa ka sngi ïakhun quarterfinal hynne ka Sngi.
Napdeng kine kine, u rangïakura ba la jop takma ha ka Asian Games, u Amit Panghal na ka Services u la khur namjop ha ka flyweight 48-51kg lyngba ka rai na ki nongbishar (unanimous decision) pyrshah ïa u Md Aarif jong ka Jammu and Kashmir. Ka long kumjuh ruh ïa u khlur ïakura na Assam, u Shiva Thapa, u ba la jop takma hynrie ha ka kyrdan ïakura light welterweight 60-63.5kg hadien ka namjop pyrshah ïa u Shashank Pradhan u ba na Delhi.
Hadien kine arngut, u Sanjeet, u lahduh jong ka Asia 2021, na ka Services u la jop pyrshah ïa u Naman Tanwar jong ka Railways ha ka thup heavyweight 86-92kg lyngba ka jingbun point.
U Sagar, ba jop takma rupa ha ka CWG 2022, jong ka Railways u la jop pyrshah ïa u Navjot Singh jong ka Chandigarh ha ka kyrdan super heavyweight 92kg. U Referee u la pynsangeh ïa kane ka jingïakhun tang ha ka wat ba nyngkong hadien ka jingïai bteng kura u Sagar ïa u liang pyrshah.