10 tylli ki takma khur ka MSKDF na ka 6th National Zendokai Karate C’ship, ha Shillong yn pynlong ïa ka lympung ban wan

Shillong, Naiwieng 29: Ki nongïalehkai Karate ka jylla hapoh ka lama jong ka Meghalaya State Karate-Do Federation (MSKDF) kiba la ïashimbynta ha ka rynsan kaba dang shen kaba la tip da ka 6″ National Zendokai Karate Championship ba la pynlong ha SAI Training Center, Kokrajhar, Assam ha ka 25 bad 26 tarik Naiwieng, 2023 ki la wanrah nam ïa ka jylla lyngba ki 10 tylli ki takma ba ki la khur.
Kine ki kynthup ïa 6 tylli ki takma ksiar, 3 tylli ka rupa bad kawei ka rnong, ha kajuh ka por ka la ïoh wanlam ïing ïa ka khusnam Runner’s Up kaba nyngkong na katei ka Championship.
Kine ki nongïalehkai kiba la khur takma ki kynthup :-
Ka Martina Blah kaba la khur ar tylli ki takma ksiar ha ka thup 45 Kg jong ka Kumite (Fight event) na bynta kiba dang 16 snem lem bad ha ka Kata (Form Event). Ka Juliana Blah ka la jop takma ksiar ha rynsan ïalehkai Kata (Form Event) kiba la 18 snem bad rupa na ka 48 Kg jong ka Kumite (Fight event). U Banshanborlang Marbaniang u la jop takma ksiar ha ka 56 kg Kumite (Fight event) nangta u la jop rupa ha ka Kata (Form Event). U Kyrshanbor Romeo Songthiang u la jop ar tylli ki takma ksiar ha ka 60 kg Kumite (Fight Event) bad kawei ha ka Kata (Form Event). U Fibeststar Songthiang u la jop takma rnong ha ka Kata (Form Event) bad takma rupa ha ka 52 Kg Kumite (Fight event).
Shuh shuh, na ka liang jong ka All India Zendokai Karate Federation (AIZKE) kaba la pynlong ïa ka 6 National Zendokai Championship 2023 ha Kokrajhar, Assam ka la ïoh jingithuh kum kawei na ki synjuk Karate ka Ri India ba la ithuh da ka Karate India Organization (KIO), Delhi.
La pyntip ruh ba ka 7″ National Zendokai Karate Championship yn pynlong ha u Jymmang ha Shillong, Meghalaya, bad ïa kane la pynbna da u Ibomcha Singh, General Secretary AIZKF ha ka sngi pynkut ïa ka 6″ National Zendokai Championship 2023 ha SAl centre kaba ha Krokajhar, Assam.