Shillong, Nailur 24: Ki nongïalam jong ka All Khasi Hills A.chik Joint Action Committee ki la ai da ka dorkhas ha u Chief Secretary ka jylla u Dr. Shakil Ahmed ban kyntu ïa ka sorkar ban pynrung ïa ka ktien Garo ha ki eksam jong ki District Selection Committee bad ban pyntreikam ïa ka polisi bhah kam bad ïa ka roster.
U John D. Sangma u nongialam ka seng haba kren ha ki lad pathai khubor, hadien ka jingiakynduh ia u Chief Secretary bad ia ka kong Isawanda Laloo u la ong ba ha Khasi bad Jaiñtia Hills ki nongshong shnong kiba dei na ka jaidbynriew Garo ki don palat iaka 4 lak kumta ka sorkar ka dei ban pynrung ïa ka ktien Garo ha ki eksam DSC.
Ki jaidbynriew Garo kiba don ha Khasi bad Jaintia ki dei ki nongshong shnong ba pura kumta la donkam ban pynrung ia ka ktien Garo khnang ba kin lah ban shim bynta ha ki eksam wad kam wad jam ha ki distrik.
Ka dei ka jingshisha ba ha ka Reservation Policy ka jingbhah kam ka long 40 ia ki Garo, bad 40 ia ki Khasi bad Jaintia bad ha ki DSC la buh ïa ka kyndon ba kiba aplai kam ki dei ban nang ia ka ktien jong kato ka jaka. Kumta namar ka ktien Garo bad Khasi kila long ki ktien sorkar kumta la dei ban pynrung ha ki eksam DSC. Utei u nongïalam u la ïathuh ba hadien ba kila ïakynduh ïa u Chief Secretary la bthah ïa ki ban ïakynduh ïa ka kong Isawanda Laloo IAS bad ha kane ka jingïakren, ka don ka jingkyrmen namar ki la ai ka jingkular ba kin sa bishar bniah ïa kane ka jingdawa.
