Nongstoiñ, Nailur 24: Ha ka sngi balang jong ka taiew 23 tarik Nailur 2026 ki paidbah nongshong shnong na kylleng ki shnong khappud, ki la rai ba long katba long da lei lei ruh kin ym treh satia ban leit pynïasoh sha Assam.
Kane ka la mih na ka jingïalang ha ka shnong Umthli, ka shnong kaba dang hap hapoh ka Hima Nongmynsaw Syiemship (Langpih Sector), kaba long ruh kum ban ai jingkyrshan pura ïa ka jingkhot jingïalang paidbah ba la khot da ki nongïalam shnong katei ka thaiñ, ban pynpaw ïa ka jingsngew pyrshah kaba jur ïa ka jingkam jong kawei na ki News Channel na Assam, kaba ong ba 95% ki paidbah ha katei ka thaiñ, ki kwah ban leit sha Assam lada ka Sorkar Meghalaya bad Assam kin pynbeit ïa u pud u sam.
Ha kane ka jingïalang ki paidbah na kylleng ki la tuid da ki spah ngut, kum ka jinglong ryntihlang ban pynshisha ba ki paidbah ka thaiñ kim mon satia da lei lei ruh ban leit sha Assam.
Ha kane ka jingïalang la sakhilang da ki dkhot jong ka Executive Dorbar ka Hima Nongmynsaw Syiemship, ki Nongsynshar shnong, ka Federation of Khasi Jaiñtia & Garo People (FKJGP) Rimuliang circle bad kiwei.
Katba ki paidbah ka thaiñ kynthei bad shynrang kiba la poi sha katei ka jingïalang ki dei na ka Shnong Mawdiangkob, Talimara, Umdiangsiar, Umdiangphiang, Umthli, Umkhamdol, Dariphang, Umbah, Ukïam, Borkhuli, Hasem,Warigro, Doledonga bad kiwei.
Ha kane ka jingïalang ki nongkren ba kham hakhmat ki la pynpaw ïa ka jingpyrshah kaba jur ïa katei ka jingkam jong ka khubor na Assam. Ki da ong ruh ba ka jingshisha ka long ba 95% na ki paidbah nongshong shnong ka thaiñ, kim kwah ban sah sha Assam lada ka jingïapynbeit pud kan ïaid noh shakhmat hynrei ki kwah ban don beit sha ka jylla Meghalaya.
Na ka liang ka Seng FKJGP lyngba u Bah Serbilin Lyngdoh President, u la ong, “Ngi pynshlur ïa ki paidbah ka thaiñ ba kim dei ban kohnguh ban leit sha Assam, namar ki paidbah ka thaiñ kiba kynthup ïa ki Jaidbynriew rit paid Khasi bad Garo, ki dei hok bad sah ha Meghalaya”.
“Ka Sorkar Meghalaya bad Assam ki dei ban sngap ïa ngi ki paidbah ka thaiñ, namar ngim treh lano lano ruh ban leit shah synshar sha Assam. Ka jaka kaba ngi shong ngi sah ka dei ka Ri ka jong ngi, ka shnong ka jong ngi, ka khyndew ka dei ka jong ngi, ka mon bad ka jingjied ruh ka dei ka jong ngi. Kumta ym don hok mano mano ban tuklar khamtam ka Assam kam dei ban shu ïai wan pynbor ïa ka mon jong ngi ki paidbah”.
U la ong ruh, “Ki ar sorkar kim dei shuh ban dang ïai pynslem ïa kane ka mat pynbeit pud bad ka Sorkar Assam ka dei ban aiti noh ïa ka jingsynshar ïa kane ka thaiñ sha Meghalaya katkum ka jingkwah jong ki nongshong shnong”.
